Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 383 Hüküm no: 480 Orijinal metin no: [97b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan’ın, İbrahim Efendi aleyhindeki alacak iddiasını ispat edemediği Ma‘rûz, Sâhib-i arzuhâl Hasan mahfil-i şer‘iyyâtda arzuhâlde ismi mezkûr kuzâtdan İbrahim Efendi mahzarında ayda yirmişer guruş ücret kavliyle mezbûr İbrahim Efendi’ye bundan akdem Seferîhisâr nâibi iken altı ay hizmet edip müddet-i mezkûrede müctemi‘ olan yüz yirmi guruş ücretim ile malımdan kendüye ikrâz ve teslîm eylediğim on sekiz buçuk guruş ki cem‘an zimmetinde yüz otuz sekiz buçuk guruş hakkım olmağla meblağ-ı mezbûrun on dokuz guruşunu yedinden ahz u kabz etmiş idim, bâkīsi olan yüz on dokuz buçuk guruşu taleb ederim deyü da‘vâ mezbûr İbrahim Efendi dahi cevâbında müdde‘î-i mezbûrun ancak kendüye beş buçuk ay hizmet eylediğini tasdîk ve ber-vech-i muharrer ücret kavlini ve karz-ı mezbûr on sekiz buçuk guruş müdde‘âsını bi’l-külliye inkâr etmekle müdde‘î-i mezbûrun kabzını mu‘terif olduğu on dokuz guruş müddet-i mezbûrede ecr-i misline müsâvî olduğu mezbûrânın takrîrlerinden müte‘ayyin oldukdan sonra ber-vech-i muharrer müdde‘âsını beyân edemeyip mezbûr İbrahim Efendi’ye vech-i şer‘î üzere muvâcehesinde yemîn verilmeğin mûcebiyle müdde‘î-i mezbûr Hasan husûs-ı mezkûr için merkūm İbrahim Efendi’ye bilâ-beyyine-i âdile bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 24 Muharremi’l-harâm sene 1172.