.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 423
Hüküm no: 519
Orijinal metin no: [92a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Müderris Ahmed Efendi b. Osman Efendi’nin yalı ve bağlarını Rumeli Kazaskeri Yahya Efendi’ye satması

Hilâl-i sütûrda mastûr olan husûsu ber-nehc-i şer‘-i kavîm mahallinde ketb ve terkīm için savb-ı şer‘-i mergūbdan bi’l-celb irsâl olunan İmâmzâde Mehmed Efendi mahmiye-i İstanbul’da Elvanzâde mahallesinde sâkine umdetü’l-eşbâh ve’l-emsâl Muhsinzâde Mehmed Ağa’nın menziline varıp, zeyl-i kitâbda muharrerü’l-esâmi olan müslimîn huzûrlarında akd-i meclis-i şer‘-i Nebevî ettikde, mahrûse-i Galata muzâfâtından Kuruçeşme nâm mahalde vâki‘ mecmû‘-ı arsasının senede merhûm ve mağfûrun-leh Sultan Bayezid Hân -aleyhi’r-rahmetü ve’l-gufrân- evkāfına üç yüz seksen dört akçe mukāta‘a-i kadîmesi olup, ebniye ve eşcâr ve kürûmu izn-i mütevellî ve işhâd ile mülkiyet üzre mebî‘ ve mağrûs olup bir tarafı İsmail Efendizâde Ahmed Efendi yalısı ve bir tarafı Nasuh Paşazâde Mehmed Bey yalısı ve bir tarafı sâhil-i bahr ve bir tarafı tarîk-i âm ile mahdûd hâriciyesi deryâya nâzır bir kebîr oda ve yanında bir sagīr oda ve bir kebîr kış odası ve bir kahve odası ve bir kiler odası ve yine deryâya nâzır bir sofa ve bir âhar sofa ve bir şadırvan ve zât-ı eşcâr-ı müsmire ve gayr-ı müsmireli bir kıt‘a kebîr ve iki kıt‘a sagīr bahçe ve bir köşk ve bir kebîr tahta-pûş ve tahtânî deryâya nâzır bir oda ve üç hizmetkâr odası ve bir kayıkhâne ve bir kebîr matbah ve dört kenîf ve bir dolap kuyusu ve bir sagīr kapı tahtası ve yine bir tarafı tûlen ve arzan bi hesâb-ı şatrancî bin elli zirâ‘ ve cebel tarafı tûlen ve arzan bi hesâb-ı terbî‘î on bin altı yüz on iki zirâ‘ cem‘an dört bin altı yüz altmış iki zirâ‘ olup, bir dolap kuyusu ve bir sagīr su kuyusu ve kanavât-ı müsennât ile mücmel mâ-i cârîyi müştemil ve bir kebîr bostan ve içinde bir köşk ve fevkānî iki köhne oda ve bir ahır ve dâhiliyesi deryâya nâzır bir mâbeyn odası ve bir sagīr sofa ve yine deryâya nâzır bir kebîr oda ve yanında bir sagīr oda ve bahçeye nâzır bir kebîr oda ve mâbeyninde bir kebîr köşk ve iki hizmetkâr odası ve bir kiler ve bir kebîr câmekân odalı iki halvetli bir hamam ve bir kebîr mahtab ve iki bahçe ve bir havuz ve bir liman ve bir kenîfi müştemil yalı ta‘bîr olunur bir menzil ve yine mârru’z-zikr yalıya muttasıl fevka’l-cebel, eşcâr-ı müsmire ve kürûm ve arsa-i beyzâyı müştemil bağlar mahmiye-i mezbûrede Gedik Paşa kurbunda Divâne Ali mahallesi ahâlîsinden olup, bundan akdem maktûlen vefât eden İshak Efendi b. İsmail’in ile’l-vefât mülkü olup, ba‘de vefâtihî vârisi zevcât-ı metrûkâtı Şerife Halime Hâtun bt. Mehmed ile Hatice bt. Abdullah ve Râbia Hâtun bt. Abdullah ve sulbî kebîr oğlu es-Seyyid Mehmed ve İbrahim Efendi ve kebîre kızı Sâkine’ye ve sulbî sagīr oğlu Ali Ağa ve sagīre kızları Sâliha ve Fâtıma ve Rahime ve Ümmügülsüm’e münhasır olup, kable’l-kısme merkūm es-Seyyid Mehmed vefât edip, verâseti vâlidesi mezbûre Şerife Halime Hâtun’a ve li eb karındaşları mezbûrûn İbrahim Efendi ve Ali Ağa ve Sâkine Hâtun ve Halime ve Fâtıma ve Rahime ve Ümmügülsüm’e münhasır olup, kable’l-kısme mezbûre Sâkine dahi fevt olup, verâseti zevci Abdülkādir Efendi b. Ramazan Efendi ile vâlidesi mezbûre Hatice’ye ve li ebeveyn er karındaşı mezbûr İbrahim Efendi’ye münhasır olup, ba‘dehû mezbûr İbrahim Efendi dahi fevt olup, verâseti vâlidesi mezbûre Hatice Hâtun’a ve li eb karındaşları mezbûrûn Ali Ağa ve Sâliha ve Fâtıma ve Rahime ve Ümmügülsüm’e münhasır ve ba‘dehû mezbûre Sâliha dahi fevt olup, verâseti li eb karındaşları mezbûrûn Ali Ağa ve Fâtıma ve Rahime ve Ümmügülsüm’e münhasıra ve tashîh-i mes’elesi bi’l-münâsahati’ş-şer‘iyye üç yüz yirmi bin yedi yüz altmış sehimden i‘tibâr olunup, sihâm-ı mezbûreden yirmi bir bin sekiz yüz yetmiş sehim mezbûre Şerife Halime Hâtun ve otuz bin yüz altmış beş sehmi mesfûre Hatice Hâtun’a ve on üç bin üç yüz altmış beş sehmi mezbûre Râbia Hâtun’a ve on beş bin yüz yirmi sehmi mezbûr Abdülkādir Efendi’ye ve doksan altı bin doksan altı sehmi mezbûr Ali Ağa’ya ve kırk sekiz bin kırk sekiz sehmi mezbûrât Fâtıma ve Rahime ve Ümmügülsüm’den her birine isâbet edip ve mârru’z-zikr yalı ve bağlar ânen fe-ânen harâba müşrif olup, îrâdından mesârifi ezyed ve ta‘mîre sıgārın kudretleri olmayıp ve kibâr hisselerin bey‘ ile sıgārın hisseleri bi’l-külliye intifâ‘dan kalmakla minvâl-i muharrer hisselerin bey‘ ve semeni istirbâh olunmak haklarında enfa‘ ve evlâ olmağla, sıgār-ı mezbûrûnun hisse-i mezkûreleri bi’l-izni’ş-şer‘î verese-i kibâr hisseleri ile ma‘an Nişancı Paşa-yı Atîk mahallesinde sâkin Müderris Ahmed Efendi ibnü’l-merhûm Osman Efendi’ye semen-i ma‘lûme bey‘ ve teslîm, ol dahi iştirâ ve kabûl ve temellük ve tesellüm ve teslîm-i semen edip, mârru’l-beyân yalı ve bostan ve bağlar mezkûr Ahmed Efendi’nin el-yevm yedinde mülkü ve hakkı olduğu, yedinde olan müte‘addid hücec-i şer‘iyyede mastûr olduğu üzre lede’ş-şer‘i’l-enver sâbit ve zâhir ve mukarrer oldukdan sonra mezkûr Ahmed Efendi meclis-i ma‘kūd-ı mezbûrda hâlâ Rumeli Kazaskeri olan işbu sâhibü’l-kitâbi’l-müstetâbi’l-hâlî ani’ş-şükr ve’l-irtiyâb a‘lemü’l-ulemâ’i’l-izâm efdalü’l-fuzalâ’i’l-fihâm alemü’l-ilm ve’l-hüdâ menârü’l-fazl ve’l-yakīn hallâlü’l-müşkilâti’d-dîniyye keşşâfü’l-mu‘dilâti’l-yakīniyye câmi‘u’l-fürû‘ ve’l-usûl hâviyyü’l-menkūl ve’l-ma‘kūl sa‘âdetlü Yahya Efendi hazretleri taraf-ı bâhirü’ş-şereflerinden husûs-ı âti’z-zikre vekîl olup, es-Seyyid Ebülmevâhib Efendi b. Sadi ve Hazînedâr Süleyman Çelebi şehâdetleriyle şer‘an vekâleti sâbite olan mezkûr Mehmed Ağa mahzarında bi’t-tav‘i’s-sâf ikrâr-ı sahîh-i şer‘î ve i‘tirâf-ı sarîh-i mer‘î kılıp, alâ tarîki’ş-şer‘ silk-i mülk-i sahîhimde münselik olup, hudûdu ve müştemilâtı bâlâda şerh ve beyân ve tefhîm ve ayân olunan yalı ve bağ ve bostanı zikr olunan yalıyı hâvî ve sâir cemî‘-i tevâbi‘ ve levâhıkı ve kâffe-i hukūk ve merâfıkı ile müvekkil-i müşârün-ileyh -en‘amallâhu te‘âlâ ni‘amehû aleyh- hazretlerine bi safkatin vâhidetin beş bin beş yüz esedî guruşa tarafeynden îcâb ve kabûlü hâvî bey‘-i bâtt-ı sahîh-i şer‘î ile bey‘ ve temlîk ve teslîm, onlar dahi iştirâ ve kabûl ve temellük ve tesellüm buyurduklarından sonra [92b] semeni olan meblağ-ı mârru’l-beyân beş bin beş yüz guruşu işbu meclis-i akde vekîl-i mesfûr Mehmed Ağa bana teslîm, ben dahi bi’t-tamâm ve’l-kemâl ahz u kabz ve tesellüm edip arâzîsi dahi bâ-izn-i mütevellî-i vakf-ı mezbûr yine müşârün-ileyh hazretlerine meccânen ferâğ ve tefvîz olundu. Fîmâ-ba‘d mârru’z-zikr yalı ve bağlar ve bostan ve sâir levâhık bi cümleti’l-hudûd ve’l-hukūk müvekkil-i müşârün-ileyh -esbağallâhu te‘âlâ ni‘amehû aleyh- hazretlerinin mülk-i müşterâlarıdır. Keyfe mâ yeşâ ve yahtâr mutasarrıf olsunlar dedikde, gıbbe’t-tasdîki’ş-şer‘î vâki‘ hâli mezbûr Mehmed Efendi mahallinde ketb ü terkīm edip, ba‘dehû cânib-i şer‘den ma‘an irsâl olunan Çukadâr el-Hâc Mehmed ve Osman b. Mehmed ile meclis-i şer‘a gelip alâ vukū‘ihî inhâ ve takrîr etmeğin, işbu vesîka-i enîka alâ mâ hüve’l-hakīka gıbbe’l-ibtigā ketb ü imlâ olundu. Fi’l-yevmi’s-sânî aşer min Cumâdelâhire li sene isneteyn ve mi’e ve elf.


Şuhûdü’l-hâl: Umdetü’l-müderrisîni’l-kirâm Hasan Efendi tezkireci, Umdetü’l-erbâbi’t-tahrîr ve’l-kalem Pîrî Efendi, Zahrü’l-erbâbi’t-tastîr Bâlizâde Mehmed Efendi kâtib-i vakf-ı Sultan Selim Han, Umdetü’s-sâdât es-Seyyid Ebu’l-Mevâhib Efendi b. Sadi el-Halebî, el-Hâc Yusuf b. Oruç, el-Hâc Mahmud Ağa b. Osman, Umdetü’l-müderrisîni’l-kirâm Şer‘iyyâtcı Sunullah Efendi, Umdetü’s-sâdât es-Seyyid Abdülkerim Efendi, Ömer Efendi tâbi‘-i hazret-i efendi, Zahrü’l-eşbâh Kethüdâ Hasan Ağa, el-Hâc Halil b. ( ), Abdurrahim Efendi b. ( ) Kasabzâde, Mehmed Efendi b. Mustafa İmâmzâde, İbrahim Çelebi b. Hasan, el-Hâc Mehmed tâbi‘-i hazret-i efendi, Süleyman Çelebi hazinedâr-ı hazret-i efendi, es-Seyyid Mahmud Çelebi b. ( ) Rum Kassâm-ı askerî, Müderris Ebûbekir Efendi ve gayruhüm.