Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 390 Hüküm no: 489 Orijinal metin no: [99b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Yeşil Bayrak Ağası Mustafa Ağa’nın varislerinin Sarraf Matos aleyhindeki alacak iddiaları Bâ-mühr-i efendi, Ma‘rûz, Sâbıkā Yeşil Bayrak Ağası müteveffâ Mustafa Ağa b. Abdurrahman b. Abdullah’ın verâseti zevce-i metrûkesi Hamide bt. Abdullah b. Abdullah ile sulbî kebîr oğlu Ahmed Efendi ve Sulbiye kebîre kızı Afîfe’ye inhisârı tahakkukundan sonra arzuhâl sâhibleri mezbûr Ahmed Efendi asâleten ve mezbûretân Hamide ve Afife taraflarından zikri âtî husûsda vekîl olduğu zâtlarını ârifân Mehmed Ağa b. Ahmed ve diğer Mehmed Çelebi b. Ahmed şehâdetleriyle sâbit olan Ebubekir b. Mustafa vekâleten meclis-i şer‘-i münîrde derûn-ı arzuhâlde mezkûrü’l-ism Sarrâf Matos v. Kenan zimmî muvâcehesinde müteveffâ-yı mezbûr Mustafa Ağa’nın hayatında mesfûr Matos’a cihet-i karzdan bin üç yüz guruş ve yedimden iştirâ ve kabz eylediği kem ayâr kemer raht bahâsından iki yüz guruş ki cem‘an ciheteyn-i mezkûreteynden zimmetinde bin beş yüz guruş deyni olmağla meblağ-ı mecmû‘-ı mezkûr bin beş yüz guruşu tamâmen mesfûr Matos’a sipâh çavuşlarından işbu hâzır bi’l-meclis el-Hâc Ahmed Çavuş yediyle edâ eyledikden sonra mesfûr Matos meblağ-ı mecmû‘-ı mezkûrun bilâ-devr murâbahası olmak üzere müteveffâ-yı mezbûr Mustafa Ağa’dan hayatında dört yüz kırk guruş dahi ahzedip mezbûr Mustafa Ağa kable’l-istirdâd fevt olmağın meblağ-ı mezkûr dört yüz kırk guruşu bi’l-asâle ve bi’l-vekâle mersûm Matos zimmîden hâlâ taleb ederiz deyü da‘vâ ve mesfûr Matos cevâbında müteveffâ-yı mezbûr Mustafa Ağa hayatında hâzır-ı mezbûr el-Hâc Ahmed Çavuş yediyle ancak bin altı yüz seksen guruş ahzını ikrâr, lâkin benim müteveffâ-yı mezbûr zimmetinde cihet-i karzdan bin beş yüz guruş ve zikr olunan kemer raht bahâsından [100a] yüz seksen guruş ki cem‘an bin altı yüz seksen guruş hakkım olup hattâ mezbûr Mustafa Ağa hayatında ciheteyn-i mezkûreteynden ol mikdâr guruş zimmetinde bana deyni olduğunu ikrâr dahi edip, bana edâ etmişdir deyü ziyâde iki yüz guruş karz da‘vâsını sipâh çavuşlarından Mustafa Çavuş b. Ahmed ve Mehmed Çavuş b. İsmail nâm şâhidân-ı mu‘addilân şehâdetleriyle muvâcehelerinde vech-i şer‘î üzere isbât edip müdde‘iyân-ı mezbûrânın ziyâde müdde‘âları olan iki yüz altmış guruş ahzını inkâr etmekle müdde‘iyân-ı mezbûrân ziyâde iki yüz altmış guruş da‘vâlarını isbâtdan izhâr-ı acz edip talebleriyle mesfûr Matos’a vech-i şer‘î üzere yemîn verilmeğin mûcebiyle müdde‘iyân-ı mezbûrân Ahmed Efendi ve Ebubekir ziyâde müdde‘âları olan dört yüz kırk guruşun iki yüz guruşunda kat‘an ve iki yüz kırk guruşunda bilâ-beyyine-i âdile bî-vech mesfûr Matos’a mu‘ârazadan men‘ olunduğu huzûr-ı âlîlerine i‘lâm olundu. Fî 27 Muharrem sene 1172