Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 391 Hüküm no: 491 Orijinal metin no: [100a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Divriğili Hasan Beşe’ye olan borcunu vasisi Mehmed’e ödemesi hususunda Mustafa’ya tenbihte bulunulması Ma‘rûz, Müteveffâ Divriği Hasan Beşe b. Veliyyüddin’in terekesini kabza ve sülüs malından vesâyâ-yı mu‘ayyenesini tenfîze ve sülüsân terekesini Divriği kasabasında sâkine babası ve hasran vârisi olan mezbûr Veliyyüddin’e îsâl ve teslîme bâ-hüccet-i şer‘iyye vasiyy-i muhtâr olan es-Seyyid Mehmed b. Hasan mahfil-i şer‘iyyâtda es-Seyyid Mustafa b. es-Seyyid el-Hâc Mehmed mahzarında müteveffâ-yı mezbûr Hasan Beşe’nin merkūm es-Seyid Mustafa zimmetinde bin yüz yetmiş bir senesi Şevvâli’nin yirminci günü târîhiyle müverrah işbu bir kıt‘a temessükü mantûkunca yedimden iştirâ ve kabz eylediği zerdava kürkü semeninden elli yedi buçuk guruş hakkı olup kable’l-ahz ve’l-istîfâ fevt olmağla meblağ-ı mezbûrun yedi buçuk guruşunu bundan akdem yedinden bi’l-asâle ahz u kabz etmiş idim. Hâlâ bâkīsi olan elli guruşu dahi mezbûr es-Seyyid Mustafa’dan bi’l-velâye taleb ederim deyü da‘vâ etdikde mezbûr es-Seyyid Mustafa dahi ber-vech-i muharrer ikrâr ü i‘tirâf etmeğin alâ-mûcebi i‘tirâfihî meblağ-ı bâkī-i mezbûr elli guruşu vasiyy-i mezbûr es-Seyyid Mehmed’e tamâmen edâ ve teslîme mezbûr es-Seyyid Mustafa’ya tenbîh olunduğu bi’l-iltimâs huzûr-ı âlîlerine i‘lâm olundu. Fî 28 Muharrem sene 1172.