|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 426 Hüküm no: 520 Orijinal metin no: [92b-1] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ömer Efendi b. Hacı Mehmed’in menzilinin vasîsi tarafından satılıp bedelinin varislere dağıtılması
Mahmiye-i İstanbul’da Harâccı Muhyiddin Mahallesi sâkinlerinden iken bundan akdem vefât eden Pabucubüyük Ömer Efendi b. el-Hâc Mehmed b. Abdullah’ın verâseti, zevce-i metrûkesi Aliye bt. Sefer ile ve li ebeveyn kız karındaşı Râziye ve li ebeveyn karındaşı Ebûbekir’in sulbî oğulları Ahmed ve Mehmed[‘e] münhasıra ve tashîh-i mes’elesi sekiz sehimden olup, sihâm-ı mezbûrenin iki sehmi mezbûre Aliye Hâtun’a ve dört sehmi mezbûre Râziye Hâtun’a ve birer sehmi mezbûrân Ahmed ve Mehmed’den her birine isâbet ve intikāl eylediği şer‘an mütehakkik oldukdan sonra mezbûrân Ahmed ve Mehmed asâleten ve mezbûre Râziye Hâtun tarafından husûs-ı âti’l-beyâna vekîl olduğu mezbûrân Ahmed ve Mehmed şehâdetleriyle sâbit olan İsmail Çelebi b. Mehmed vekâleten meclis-i şer‘-i şerîf-i enverde, müteveffâ-yı mezbûrun vasiyy-i muhtârı olmağla terekesine vâzı‘u’l-yed olan İmâm Ali Efendi b. Musa mahzarında her biri ikrâr-ı tâm ve takrîr-i kelâm edip, müteveffâ-yı mezbûrun terekesinden mahalle-i mezbûrede vâki‘ ma‘lûmü’l-hudûd menzili vasiyy-i mezbûr Ali Efendi yüz yirmi bir bin akçeye âhara bey‘ ü teslîm ve kabz-ı semen edip, meblağ-ı mezbûrdan müteveffâ-yı mezbûrun düyûn-ı müsbete ve vesâyâ-yı ma‘lûmesi ihrâc olundukdan sonra bâkī kalan altmış bir bin yedi yüz otuz iki akçeden her birimizin hissesine isâbet eden yedi bin yedi yüz on altışar akçe ile müvekkilem mezbûre Râziye Hâtun’a isâbet eden otuz bin sekiz yüz altmış akçeyi vasiyy-i mezbûr Ali Efendi bize teslîm, biz dahi asâleten ve vekâleten ber vech-i meşrûh hisselerimizi tamâmen yedinden ahz u kabz edip, meblağ-ı mezbûreden vasiyy-i merkūm yedinde ve kıbelinde bir akçe ve bir habbe kalmamışdır dediklerinde, gıbbe’t-tasdîki’ş-şer‘î mâ hüve’l-vâki‘ bi’t-taleb ketb olundu. Fi’l-yevmi’s-sâlis min Recebi’l-ferd li sene isneteyn ve mi’e ve elf.
Şuhûdü’l-hâl: El-Hâc İbrahim b. Abdullah, Yusuf b. Mustafa, Musa b. Mahmud, İbrahim Efendi b. Ahmed, Mustafa Çelebi b. Ali, Mehmed Çelebi b. Mehmed, İmâm Mehmed Efendi b. (...), el-Hâc Mehmed b. Hasan, Receb Ağa b. Ali, Abdullah Çelebi b. Receb ve gayruhüm.
|