Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 395 Hüküm no: 499 Orijinal metin no: [101b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcunu ödemesi hususunda Prepiyon bt. Kirkor’a tenbihte bulunulması Bâ-mühr-i efendi, Ma‘rûz, Arzuhâl sâhibesi olup zâtı ta‘rîf-i şer‘î ile mu‘arrefe olan Atike bt. Ahmed nâm hatun meclis-i şer‘-i münîrde derûn-ı arzuhâlde mezkûretü’l-ism Prepiyon bt. Kirkor nâm Nasrâniye muvâcehesinde târîh-i i‘lâmdan bir sene mukaddem mesfûre Prepiyon Nasrâniyeye malımdan üç yüz otuz beş guruş ikrâz ve teslîm, ol dahi yedimden iktirâz ve kabz ve kendi masârıfına sarfla istihlâk etmeğin meblağ-ı mezkûru mersûme Prepiyon Nasrâniyeden hâlâ taleb ederim deyü da‘vâ ve mesfûre Prepiyon Nasrâniye cevâbında, müdde‘iye-i mezbûre Atike Hatun’dan ancak iki yüz seksen dört guruş iktirâz ve kabz eyledim deyü ikrâr ve ziyâde elli bir guruş da‘vâsını ba‘de’l-inkâr müdde‘iye-i mezbûre Atike Hatun ber-minvâl-i muharrer müdde‘âsını lede’t-tezkiye şehâdetleri makbûle olan Kocamustafapaşa’da Oturakçı es-Seyyid İbrahim Beşe b. Mehmed ve Çubukçu Mehmed Beşe b. Mustafa şehâdetleriyle muvâcehesinde vech-i şer‘î üzere isbât etmeğin mûcebiyle meblağ-ı mezkûr üç yüz otuz beş guruşu müdde‘iye-i mezbûre Atike Hatun’a edâ ve teslîme mesfûre Pirabiyon Nasrâniyeye tenbîh olunduğu huzûr-ı âlîlerine i‘lâm olundu. Fî 2 Safer sene 1172.