Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 399 Hüküm no: 503 Orijinal metin no: [102b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Efendi’nin, Çukadar Hüseyin aleyhindeki alacak davasında anlaşma sağlanması Ma‘rûz, Sâhib-i arzuhâl kuzâtdan Halil Efendi mahfil-i şer‘iyyâtda derûn-ı arzuhâlde mezkûrü’l-ism Çukadâr Hüseyin muvâcehesinde mezbûr Hüseyin’e bin yüz yetmiş senesi Şevvâli evâhirinde Selanik Mahkemesi’nde bi-tarîkı’l-emâne kırk guruş def‘ ü teslîm, ol dahi ahz u kabz etmekle meblağ-ı mezbûru mezbûr Hüseyin’den hâlâ taleb ederim deyü da‘vâ etdikde mezbûr Hüseyin cevâbında ikrâr lâkin meblağ-ı mezbûr kırk guruşu târîh-i mezkûrda Selanik kādısı Abdullah Efendi’ye def‘ ü teslîm eyle deyü bana emr etmekle ben dahi meblağ-ı mezbûru kethüdâ Abdullah Efendi’ye emrine binâen def‘ ü teslîm etmiş idim [deyü] def‘e tasaddî etdikde ol dahi inkâr etmeğin müdde‘î-i mezbûr Halil Efendi ber-vech-i muharrer müdde‘âsından bâ-vesâtet-i muslihîn yirmi guruş bedel-i makbûza sulh olup mâ‘adâsına [ve] bedel-i sulh-ı merkūma müte‘allika âmme-i da‘vâdan her biri âharın zimmetini ibrâ-i âm ile ibrâ ve iskāt edip kat‘-ı nizâ‘ etdikleri huzûr-ı âlîlerine i‘lâm olundu. Fî 3 S sene 1172.