.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 427
Hüküm no: 521
Orijinal metin no: [93a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İstanbul gayrımüslim ve hamallarından kürekçi bedellerinin tahsil edilmesi

Akdâ kudâti’l-müslimîn evlâ vulâti’l-muvahhidîn ma‘denü’l-fazl ve’l-yakīn vârisu ulûmi’l-enbiyâ ve’l-mürselîn râfi‘ü a‘lâmi’ş-şerî‘ati ve’d-dîn el-muhtas bi mezîdi inâyeti’l-meliki’l-mu‘în Mevlânâ İstanbul Kadısı -zîdet-fezâ’iluhû- tevkī‘-i refî‘-i hümâyûn vâsıl olıcak ma‘lûm ola ki, Hazîne-i âmirem defterlerinde kazâ-i mezbûrda vâki‘ hammâlân ve Yahud’dan ve Rumiyân ve Ermeniyân tâifelerinin deryâ yüzüne çıkacak donanma-yı hümâyûn kadırgaları için ihrâc eyledikleri aynî kürekçi neferâtı üç yüz doksan nefer olup, bin yüz iki senesine mahsûb olmak üzre bedelleri tahsîli lâzım ve mühim olmağın, Hazîne-i âmirem’den irsâl olunan mühürlü ve nişânlı mevkūfât defteri sûreti mûcebince cem‘ ve tahsîl ettirilmek fermânım olmuşdur. Buyurdum ki, hükm-i şerîfimle vardıkda bu bâbda sâdır olan emrim üzre amel edip, dahi târih-i mezbûra mahsûb olmak üzre kırk nefer hammâlân tâifesinin her bir neferi için ellişer guruş-ı esedî bedellerini ve yine İstanbul Yahudileri tâifesinden yüz elli nefer ve Rumiyân-ı İstanbul ve Hasköy tâifesinden elli nefer ve yine Rumiyân-ı Galata tevâbi‘inden elli nefer ve Ermeniyân tâifesinden yüz nefer ki, cem‘an üç yüz elli nefer ki her bir neferinden ellişer guruş-ı tâm bedellerin irsâl olunan mühürlü ve nişânlı mevkūfât defteri sûreti mûcebince cem‘ ve tahsîl ve donanma-yı hümâyûnum kadırgalarının iktizâ eden kürekçi bedelleri için Tersâne-i âmirem emîni -zîde-mecduhû- tarafına teslîm ettirip, hilâf-ı emr ve defter kimesneye ta‘allül ve nizâ‘ ettirmeyesin ve meblağ-ı mezbûr, rûz-ı deryâya çıkacak donanma-yı hümâyûnum kadırgalarının iktizâ eden kürekçi bedeliyyesi için olmağla kesr ve defterden ve hilâf-ı emr ve defter kimesneye zulüm ve te‘addî olunmakdan be gāyet ihtirâz eyleyesiz, şöyle bilesiz, alâmet-i şerîfe i‘timâd kılasız. Tahrîren fi’l-yevmi’s-sânî ve’l-ışrîn [min] şehri Cumâdelâhire li sene isneteyn ve mi’e ve elf. Be-makām-ı Kostantıniyye el-mahrûse.