Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 400 Hüküm no: 505 Orijinal metin no: [103a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Mustafa Ağa’nın hayvanlarını varislerine teslim etmesi hususunda ortağı Mehmed Emin Çelebi’ye tenbih olunması Derûn-ı arzuhâlde mezkûrü’l-ism müteveffâ Mustafa Ağa b. Mehmed’in verâseti zevce-i metrûkesi Şerife Hanife bt. ( ) ile sulbî kebîr oğlu sâhib-i arzuhâl es-Seyyid Mehmed ve kebîre kızları Şerife Fâtıma ve Şerife Zübeyde’ye inhisârı tahakkukundan sonra mezbûr es-Seyyid Mehmed ile zâtları ta‘rîf-i şer‘î ile mu‘arrefe olan mezbûrât Hanife ve Şerife Fâtıma ve Şerife Zübeyde mahfil-i şer‘iyyâtda arzuhâlde ismi mezkûr Mehmed Emin Çelebi b. Mehmed muvâcehesinde babamız ve mûrisimiz müteveffâ-yı mezbûr Mustafa Ağa’nın merkūm Mehmed Emin Çelebi’nin babası müteveffâ-yı merkūm Mehmed ile hayatlarında Haslar kazâsına tâbi‘ Pirinçci karyesinde vâki‘ ber-vech-i iştirâk taht-ı icârelerinde olan çiftlikde mevcûd mülkü olan sekiz re’s manda ineği ve üç buzağı ve üç manda öküzü ve dört re’s karasığır ineği ve iki buzağı ve iki re’s karasığır öküzü ve altı re’s dana ve buzağı ki cem‘an yirmi sekiz re’s hayvânât bize mevrûs olmuş iken mezbûr Mehmed Emin Çelebi bi-gayr-ı hakkın zabt eder, hâlâ taleb ederiz deyü da‘vâ etdiklerinde, mezbûr Mehmed Emin Çelebi dahi cevâbında fi’l-hakīka zikirleri mürûr eden yirmi sekiz re’s hayvânât müdde‘ûn-ı mezbûrûnun babaları müteveffâ-yı merkūm Mustafa Ağa’nın mülkü olup kendülerine mevrûs hakları olduğunu tasdîk ve hâlâ zikr olunan yirmi sekiz re’s hayvânât bi-a‘yânihim kendi yedinde olduğunu ikrâr ü i‘tirâf etmeğin alâ-mûcibi i‘tirâfihî sâlifü’z-zikr yirmi sekiz re’s hayvânâtı bi-a‘yânihim müdde‘ûn-ı mezbûrûna def‘ ü teslîme merkūm Mehmed Emin Çelebi’ye tenbîh olunduğu huzûr-ı âlîlerine i‘lâm olundu. Fî 4 Safer sene 1172.