Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 400 Hüküm no: 506 Orijinal metin no: [103a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Vefat eden Ömer b. Ahmed’in varisleri arasındaki miras davası Ma‘rûz, Müteveffâ el-Hâc Ömer b. Ahmed b. Abdullah’ın verâseti zevce-i metrûkesi Fâtıma Hatun ile vâlidesi Meryem ve li-ebeveyn karındaşları Ebubekir ve Mehmed’e ba‘de’l-inhisâr mezbûrûn Meryem ve Ebubekir ve Mehmed mahfil-i şer‘iyyâtda zâtı ta‘rîf-i şer‘î ile mu‘arrefe olan zevce-i mezbûre Fâtıma Hatun muvâcehesinde mûrisimiz müteveffâ-yı mezbûrun terekesinden olan bir nefer Gürciye tesmiye câriye ile bir nefer zenciye câriyesini zevce-i mezbûre Fâtıma Hatun müstakılleten zabt etmekle câriyetân-ı mezbûretândan hisse-i irsiyemizi mezbûre Fâtıma’dan taleb ederiz deyü da‘vâ ve mezbûre Fâtıma Hatun cevâbında, vaz‘-ı yedini ikrâr ve müdde‘iyyûn-ı mezbûrûnun ber-minvâl-i muharrer müdde‘âlarını ba‘de’l-inkâr müdde‘iyyûn-ı mezbûrûn ber-vech-i muharrer müdde‘âlarını isbâtdan izhâr-ı acz edip tahlîfe dahi tâlib olmamalarıyla müdde‘iyyûn-ı mezbûrûn Meryem ve Ebubekir ve Mehmed husûs-ı mezkûr için zevce-i mezbûre Fâtıma Hatun’a bilâ-beyyine-i âdile bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 3 Safer sene 1172.