Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 401 Hüküm no: 507 Orijinal metin no: [103a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Gebze ahalisinin Halil Efendi hakkındaki şikâyetlerinden vazgeçmeleri, Halil’in nahiye işlerine karışmayacağına dair taahhüdü Bâ-mühr-i efendi, Ma‘rûz, Medîne-i Üsküdar’a muzâfe Gekbüze nâhiyesinde nefs-i Gekbüze kasabasında eş-Şeyh Hüseyin Efendi b. Mehmed ve Menzilci el-Hâc Mustafa Ağa b. Mehmed ve el-Hâc Ali b. Hasan ve İsmail Ağa b. Hasan ve Hasan Usta b. Abdullah ve el-Hâc Yusuf Odabaşı b. el-Hâc İbrahim ve Tavşanlı karyesinden İmam Mehmed Efendi b. Mustafa ve Hatib Hüseyin Efendi b. Osman ve Mehmed Beşe b. Osman ve Demirciler karyesinden eş-Şeyh Ömer Efendi b. Mehmed ve İsmail Beşe b. Ali ve Habib Beşe b. Abdullah ve Kara Mustafa Beşe b. Halil ve Tuzla karyesinden İbrahim Ağa b. İsmail ve Hafız Mehmed Efendi b. el-Hâc İbrahim ve Hoca Mehmed Efendi b. Mehmed [103b] ve Aydınlı karyesinden Molla Ahmed b. Mehmed ve Alemdar Mahmud Beşe b. Mehmed ve Ali Beşe b. Mustafa nâm on dokuz nefer kimesneler meclis-i şer‘-i münîrde kasaba-i mezbûre a‘yânından olup Yusuf Çavuş mübâşeretiyle bâ-fermân-ı âlî Âsitâne-i sa‘âdete ihzâr etdirdikleri el-Hâc Halil Efendi b. Abdullah mahzarında mezbûr el-Hâc Halil Efendi birkaç seneden beri nâhiye-i mezkûrede a‘yândan olmağla tevzî‘ defterlerine kendi için ziyâde akçe vaz‘ ve ahzedegelip bin yüz yetmiş bir senesi evâhirinde hâlâ Rakka vâlîsi vezîr-i mükerrem sa‘âdetlü Hüseyin Paşa hazretleri kasaba-i mezbûreden mürûr eyledikde sene-i mezkûre Zilka‘desi’nin yirmi beşinci gününden Zilhiccesi yirmi beşinci gününe gelince bir ayda vezîr-i müşârün-ileyh hazretlerine verilen bârgir ücreti ve masârıf-ı sâire bin sekiz yüz otuz üç guruşa bâliğ olmuşdur deyü kavl-i hoduyla ol mikdâr guruş ahâlî-i nâhiye üzerlerine tevzî‘ ve defter ve tahsîldâr ta‘yîn etmişdir deyü teşekkî etdiklerinde mezbûr el-Hâc Halil Efendi dahi defterlere ziyâde akçe vaz‘ eylediğini münkir ve defter-i mezkûr yedinde olmağla mezbûrûn sâir ahâlî-i nâhiye ile mahâllinde hesâb edip müceddeden defter etmeleri için defter-i mezkûru meclis-i şer‘de yedlerine def‘ ü teslîm, onlar dahi ba‘de’l-ahz mezbûr el-Hâc Halil Efendi ba‘de’l-yevm a‘yânlık iddi‘âsında olmayıp kendi umûruyla mukayyed ve min-ba‘d nâhiye-i mezkûr umûruna müdâhale ve ta‘arruz etmemek üzere müte‘ahhid olduğunda mezbûrûn dahi şikâyetlerinden fâriğler olup mezbûr el-Hâc Halil Efendi ile kat‘â da‘vâ ve nizâ‘ ve husûmetimiz kalmamışdır deyü takrîrleri ve mezbûr el-Hâc Halil Efendi fîmâ-ba‘d a‘yânlık iddi‘âsında olmayıp nâhiye-i mezkûr umûruna müdâhale etmemek üzere emr-i âlî ricâsında oldukları huzûr-ı âlîlerine i‘lâm olundu. Ma‘lûm-ı devletleri buyuruldukda fermân men-lehü’l-emr hazretlerinindir. Fî 4 Saferi’l-hayr sene 1172.