Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 402 Hüküm no: 508 Orijinal metin no: [103b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kadı Abdullah Efendi’nin, niyabet hususunda Kadı Hasan Efendi ile olan alacak davasında anlaşma sağlanması Ma‘rûz, Sâhib-i arzuhâl kuzâtdan Abdullah Efendi mahfil-i şer‘iyyâtda derûn-ı arzuhâlde mezkûrü’l-ism kuzâtdan es-Seyyid Hasan Efendi muvâcehesinde merkūm Hasan Efendi sene-i sâbıkā Zilka‘desi gurresinde mutasarrıf olduğu Narda kazâsının niyâbetini şehriyesi iki yüz ellişer guruşa olmak üzere bana tefvîz ve sipâriş etmekle, ben dahi ber-vech-i muharrer kazâ-i mezbûru tarafından niyâbete dokuz ay zabt edip bî-hâsıl olmağla merkūm es-Seyyid Hasan Efendi’ye dokuz ayda harc-ı mürâsele nâmıyla malımdan medfû‘um olan iki yüz elli guruşu ve şehriyelerden cem‘an bin beş yüz guruş hasarâtım olmağla merkūm Hasan Efendi’den taleb ederim deyü da‘vâya tasaddî etdikde ol dahi müdde‘î-i mezbûrun ber-vech-i muharrer hasarâtını münkir olup beynlerinde ba‘de vukū‘i’l-münâza‘a müdde‘î-i mezbûr Abdullah Efendi da‘vâ-yı mezkûresinden merkūm es-Seyyid Hasan Efendi ile bâ-vesâtet-i muslihîn iki yüz yirmi beş guruş bedel-i makbûza sulh olup mâ‘adâsına ve bedel-i sulh-ı mezkûra ve bi’l-cümle husûs-ı mezkûra müte‘allika âmme-i de‘âvîden her biri âharın zimmetini ibrâ ve iskāt edip ve her biri âharın ibrâsını dahi tasdîk ve kabûl edip kat‘-ı nizâ‘ etdikleri huzûr-ı âlîlerine i‘lâm olundu. Fî 4 Muharrem sene 1172.