Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 402 Hüküm no: 509 Orijinal metin no: [104a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kayseri Naibi Esirîzade Abdülbaki Efendi’nin mahkemeyi basanlar hakkındaki davasından vazgeçmesi Bâ-mühr-i efendi, Ma‘rûz, İşbu arz derûnunda ismi mezkûr sâbıkā Kayseriye nâibi Esîrîzâde Abdülbaki Efendi meclis-i şer‘-i münîrde Kayseriye ahâlîsinden olup arz-ı mezkûr derûnunda isimleri mastûr Yanık Ömer Ağa ve Kobdur Ahmed Ağa ve Abdulkadir Ağa ve Benli Ali Ağa muvâcehelerinde mezbûrûn Yanık Ömer Ağa ve Kobdur Ahmed Ağa ve Abdulkadir Ağa ve Benli Ali Ağa ve gāib ani’l-meclis Uzun Süleyman Ağa ve Kara Mehmed Ağa nâm kimesneler hevâdârları olan yüz neferden mütecâviz eşkıyâ ile bin yüz yetmiş bir senesi Ramazanı’nda ben Kayseriye’de nâibü’ş-şer‘ iken mahkememi basıp ber-mûceb-i defter-i müfredât emvâlimi nehb ü gāret etmişler idi deyü da‘vâsını mezbûrûn münkirler olup beynlerinde ba‘de’l-münâza‘a mezbûr Esîrîzâde Abdülbaki Efendi da‘vâ-yı mezkûresinden meccânen fâriğ olup husûs-ı mezkûre müte‘allika âmme-i de‘âvî ve kâffe-i mutâlebâtdan mezbûrûn Yanık Ömer Ağa ve Kobdur Ahmed Ağa ve Abdulkadir Ağa ve Benli Ali Ağa ve gāibân-ı mezbûrân Uzun Süleyman Ağa ve Kara Mehmed Ağa’dan her birinin zimmetini ibrâ-i âm ile ibrâ edip bu vechile kat‘-ı nizâ‘ etdikleri huzûr-ı âlîlerine i‘lâm olundu. Fî 4 Saferi’l-hayr sene 1172.