Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 403 Hüküm no: 510 Orijinal metin no: [104a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Esirci Kara Mehmed’in cariye davasını ispat edemediği Ma‘rûz, Sâhib-i arzuhâl Esirci Kara Mehmed bundan akdem mahfil-i şer‘iyyâtda Fâtıma bt. Abdullah’ın vekîl-i şer‘îsi Hafız Hüseyin Efendi muvâcehesinde evsâfı beynimizde ma‘lûm yedi yüz guruş kıymetli bir re’s Gürciye câriyemi bin yüz yetmiş bir senesi Zilka‘desi’nin on ikinci günü ismi ma‘lûmum olmayan bir hatun ve işbu hâzırate bi’l-meclis Zenbil Nasrâniye ile müvekkile-i mezbûre Fâtıma Hatun’un sâkine olduğu menziline götürüp yevm-i şirâ tarîkiyle mezbûre Fâtıma’ya def‘ ü teslîm, ol dahi yedimizden ahz u kabz etmiş idi deyü câriye-i mezkûreyi mezbûre Fâtıma’dan da‘vâ ve ber-vech-i muharrer müdde‘âsını isbât edememekle mezbûr Kara Mehmed dönüp tekrâr mahfil-i şer‘iyyâtda Emetullah bt. Ebubekir b. Abdullah’ın zevci ve tarafından sâbitü’l-vekâle vekîl-i şer‘îsi mezbûr Hafız Hüseyin Efendi muvâcehesinde câriye-i mezbûreyi târîh-i merkūmda mezbûre Fâtıma’ya vermeyip kezâlik müvekkile-i mezbûre Emetullah’a vermiş idim deyü da‘vâ etdikde müdde‘î-i mezbûrun takrîr-i meşrûhu üzere câriye-i mezbûreyi mukaddemâ Fâtıma’dan da‘vâ edip isbât edememekle dönüp müvekkile-i mezbûre Emetullah’a vermiş idim deyü da‘vâsı fetvâ-yı şerîfe mûcebince meşrû‘a olmamağla müdde‘î-i mezbûr Kara Mehmed bî-vech mu‘ârazadan men‘ olunduğu huzûr-ı âlîlerine i‘lâm olundu. Fî 4 Saferi’l-hayr sene 1172.