Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 403 Hüküm no: 511 Orijinal metin no: [104a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rukiye bt. Mustafa’ya olan borcunu ödemesi hususunda Hamamcı Ömer’e tenbihte bulunulması Ma‘rûz, Arzuhâl sâhibesi olup zâtı ta‘rîf-i şer‘î ile mu‘arrefe olan Şerife Rukiye bt. es-Seyyid Mustafa nâm hatun mahfil-i şer‘iyyâtda derûn-ı arzuhâlde mezkûrü’l-ism Hamamcı Ömer b. Abdullah muvâcehesinde mezbûr Ömer’in zevcesi gāibete ani’l-meclis Âişe bt. el-Hâc Hasan nâm hatun zimmetinde yedimden müşterâ ve makbûz ecnâsı beynimizde ma‘lûm hamamcı metâ‘ı semeninden hakkım olan yüz altmış guruşun edâsına bi’l-emr ve’l-kabûl mezbûr Ömer kefîl ve zâmin olup meblağ-ı mezbûrun on beş guruşunu bundan akdem asîle-i mezbûreden ahz u kabz edip bâkī kalan yüz kırk guruşu mezbûr Ömer’den kefâletine binâen hâlâ taleb ederim deyü da‘vâ etdikde ol dahi cevâbında vech-i muharrer üzere kefâlet-i mezkûreyi ikrâr lâkin sene-i sâbıkā Zilhiccesi’nin yirmi üçüncü günü Ma‘cûncu Hamamı’nda meblağ-ı mezkûrdan seksen beş guruşunu kendüye def‘ ü teslîm, ol dahi yedimden ahz u kabz etmekle ancak zimmetimde altmış guruş bâkī kalmışdır deyü ol mikdârında ba‘de’d-def‘ ve’l-inkâr dâfi‘-i mezbûr Hamamcı Ömer’in seksen beş guruş def‘ini [104b] beyâna ba‘de’l-havâle ikrârıyla lâzım gelen altmış guruşu müdde‘iye-i mezbûre Şerife Rukiye’ye edâ ve teslîme bi-hükmi’l-kefâle mezbûr Ömer’e tenbîh olunduğu huzûr-ı âlîlerine i‘lâm olundu. Fî 5 Safer sene 1172.