Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 404 Hüküm no: 512 Orijinal metin no: [104b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcunu ödemesi hususunda İstanköylü Mustafa’ya tenbihte bulunulması Ma‘rûz, Sefine reislerinden arzuhâl eden Mavriliyos v. Nikola zimmî mahfil-i şer‘iyyâtda derûn-ı arzuhâlde ismi mezkûr tüccârdan İstanköylü el-Hâc Mustafa muvâcehesinde mezbûr el-Hâc Mustafa zimmetinde cihet-i karzdan otuz guruş ve beynimizde ma‘lûm navl-ı sefineden yüz on guruş ki cem‘an ciheteyn-i mezkûreteynden hakkım olan yüz kırk guruş bundan akdem mezbûr el-Hâc Mustafa’dan da‘vâ ve beynimizde ba‘de’l-münâza‘a meblağ-ı mecmû‘-ı mezkûr da‘vâmdan mezbûr el-Hâc Mustafa ile bâ-vesâtet-i muslihîn doksan guruş üzerine ba‘de akdi’l-musâlaha ve’l-kabûl mâ‘adâsı olan elli guruşa müte‘allika da‘vâdan mezbûrun zimmetini ibrâ etmiş idim. Hâlâ bedel-i sulh olan meblağ-ı mezkûr doksan guruşu mezbûr el-Hâc Mustafa’dan taleb ederim deyü ba‘de’d-da‘vâ ve’l-inkâr müdde‘î-i mezbûr ber-vech-i muharrer müdde‘âsını lede’t-tezkiye şehâdetleri makbûle olan Osman Çelebi b. Hasan ve el-Hâc Süleyman Çelebi b. Mehmed şehâdetleriyle muvâcehesinde vech-i şer‘î üzere isbât etmeğin mûcebiyle bedel-i sulh-ı mezkûr doksan guruşu müdde‘î-i mezbûr Mavriliyos zimmîye edâ ve teslîme mezbûr el-Hâc Mustafa’ya tenbîh olunduğu huzûr-ı âlîlerine i‘lâm olundu. Fî 6 Saferi’l-hayr sene 1172.