Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 407 Hüküm no: 516 Orijinal metin no: [105a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Borcunu ödemesi hususunda Havva Hatun’a tenbihte bulunulması Ma‘rûz, Arzuhâl sâhibesi olup zâtı ta‘rîf-i şer‘î ile mu‘arrefe olan Kezban Hatun mahfil-i şer‘iyyâtda kezâlik zâtı ta‘rîf-i şer‘î ile mu‘arrefe olan derûn-ı arzuhâlde mezkûretü’l-ism Havva Hatun muvâcehesinde mezbûre Havva Hatun zimmetinde bir sene mukaddem yedimden iştirâ eylediği beynimizde ma‘lûm menzil semeninden bâkī otuz altı guruş hakkım olmağla hâlâ taleb ederim deyü da‘vâ, mezbûre Havva cevâbında müdde‘iye-i mezbûreye zimmetimde ancak yirmi altı [guruş] deynim vardır deyü ikrâr, ziyâde on guruş da‘vâsını ba‘de’l-inkâr müdde‘iye-i mezbûre Kezban Hatun ber-minvâl-i muharrer ziyâde on guruş da‘vâsını isbâta kādire olmayıp talebiyle mezbûre Havva’ya muvâcehesinde vech-i şer‘î üzere yemîn verilmeğin mûcebiyle müdde‘iye-i mezbûre on guruş ziyâde müdde‘âsıyla bilâ-beyyine bî-vech mu‘ârazadan ba‘de’l-men‘ alâ-mûcibi i‘tirâfihî meblağ-ı mezbûr yirmi altı guruşu müdde‘iye-i mezbûre Kezban Hatun’a edâ ve teslîme mezbûre Havva’ya tenbîh olunduğu huzûr-ı âlîlerine i‘lâm olundu. Fî 8 Saferi’l-hayr sene 1172.