Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 408 Hüküm no: 518 Orijinal metin no: [105b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Menzil bedelinden olan borcunu ödemesi hususunda Bîzebân Ali Ağa’ya tenbih olunması Bâ-mühr-i veliyyü’n-ni‘am Ma‘rûz, Kasaba-i Beşiktaş’da Kılıç Ali Paşa mahallesinde sâkine Şerife Hadice Hatun bt. es-Seyyid Mehmed b. Abdullah tarafından zikri âtî husûsda vekîl olduğu zâtını ârifân Abdulkadir Ağa b. Mustafa ve el-Hâc Abdullah Ağa b. Mehmed şehâdetleriyle sâbit olan İmam el-Hâc Abdullah Efendi b. Abdulkadir ve meclis-i şer‘-i münîrde sâhib-i arzuhâl bî-zebân Ali Ağa b. Şa‘ban’ın vekîl-i müseccel-i şer‘îsi Mehmed Paşa Câmi‘-i şerîfi İmâmı Hafız el-Hâc Ali Efendi b. Mehmed mahzarında müvekkilem mezbûre Şerife Hadice Hatun târîh-i i‘lâmdan on yedi ay mukaddem İstanbul’da Peykhâne kurbünde Uzun Şücâ‘ mahallesinde vâki‘ bir tarafdan Fenârî imâmına meşrûta vakıf menzil ve bir tarafdan müezzine meşrûta vakıf menzil ve bir tarfdan Cebecibaşı Vakfı’ndan mekteb-i şerîf ve bir tarafdan tarîk-i âm ile mahdûd hâriciyesi yedinde mülk ve hakkı ve dâhiliyesi Haremeyn-i şerifeyn ve Cebecibaşı vakıflarından taht-ı tasarrufunda olan ma‘lûmü’l-müştemilât menzilini müvekkil-i mûmâ-ileyh bî-zebân Ali Ağa’ya hâriciyesi bin iki yüz guruşa bâtten bey‘ ve temlîk ve teslîm ve dâhiliyesini dahi mütevellîleri ma‘rifetleriyle dört bin üç yüz guruş bedel mukābelesinde kat‘an ferâğ ve tefvîz, mûmâ-ileyh bî-zebân Ali Ağa dahi ber-vech-i muharrer iştirâ ve temellük ve tefevvüz ve tesellüm ve kabûl eyledikden sonra semen-i mezkûr bin iki yüz guruşu tamâmen ve bedel-i merkūmun üç bin iki yüz otuz guruşunu müvekkilem mezbûre Şerife Hadice Hatun ahz ve istîfâ etmiş idi. Bedelden bâkī kalan bin yetmiş guruşu dahi müvekkil-i mûmâ-ileyh bî-zebân Ali Ağa’dan bi’l-vekâle taleb eylediğimde hâlâ bana iki yüz guruş dahi vermekle ben dahi bi’l-vekâle ahzedip bâkī kalan sekiz yüz yetmiş guruşa ve menzil-i mezkûrun mülkünde tağrîr ve gabnine müte‘allika âmme-i da‘vâdan müvekkil-i mûmâ-ileyh bî-zebân Ali Ağa’nın zimmetini bi’l-vekâle ibrâ-i âm ile ibrâ ve iskāt eylediğimde mûmâ-ileyh bî-zebân Ali Ağa’nın vekîli mezbûr Hafız el-Hâc Ali Efendi dahi menzil-i mezkûrun mülkünde tağrîr ve gabnine ve bedel-i medfû‘un istîfâsına müte‘allika âmme-i da‘vâdan bi’l-vekâle müvekkil-i mezbûre Şerife Hadice Hatun’un zimmetini ibrâ-i âm ile ibrâ ve iskāt edip ve her birimiz âharın ibrâsını bi’l-vekâle kabûl eyledik deyü ba‘de’l-ikrâr ve’t-tasdîk kat‘-ı nizâ‘ etdikleri huzûr-ı âlîlerine i‘lâm olundu. El-emru li-men-lehü’l-emr. Fî 7 min Saferi’l-hayr sene [1]172.