Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 409 Hüküm no: 519 Orijinal metin no: [106a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hasan Ağa’ya hürriyetini ispat eden köle bedelinden olan borcunu ödemesi hususunda Hasan b. Abdullah’a tenbihte bulunulması Bâ-mühr-i hazret-i veliyyü’n-ni‘am Ma‘rûz, Bâ‘is-i i‘lâm Hasan Ağa b. Yusuf meclis-i şer‘-i münîrde el-Hâc Hasan b. Abdullah mahzarında mezbûr el-Hâc Hasan’dan bir buçuk ay mukaddem Esirci Mustafa Beşe vesâtatıyla esir pazarında Gürciyyü’l-asl olmak üzere üç yüz altmış guruş semen-i medfû‘ ve makbûza iştirâ ve kabz eylediğim işbu hâzır bi’l-meclis Hüseyin nâm şâbb-ı emred yedimde iken ben Kastamonu’da Yenimahalle ahâlîsinden ve mellâh tâifesinden Mustafa b. Ahmed’in firâşından hâsıl ve zevcesi hürretü’l-asl Emine bt. Ali’den mütevellid olup bana ve ebeveynime kat‘an rıkk târî olmamış, hürrü’l-aslım deyü da‘vâ ve ber-vech-i muharrer hürriyetini Kastamonulu Çörekçi Hüseyin Beşe b. Hasan ve Süleyman Beşe b. Hüseyin şehâdetleriyle hâkim-i muvakkı‘-ı sadr-ı kitâb huzûrunda benim muvâcehemde vech-i şer‘î üzere isbât edip hürriyetine hüküm ve sebîli tahliye olunmağla mevsûf-ı mezbûr Hüseyin’in semeni olmak üzere mezbûr el-Hâc Hasan’a medfû‘um olan meblağ-ı mezbûr üç yüz altmış guruşu mezbûr el-hâc Hasan’dan bi’l-mürâca‘a taleb ederim deyü da‘vâ, ol dahi cevâbında müdde‘î-i mezbûrun ber-minvâl-i muharrer müdde‘âsını ikrâr ü i‘tirâf etmeğin alâ-mûcibi i‘tirâfihî meblağ-ı mezbûr üç yüz altmış guruşu müdde‘î-i mezbûr Hasan Ağa’ya tamâmen red ve teslîm için mezbûr el-Hâc Hasan’a şer‘an tenbîh olunduğu bi’l-iltimâs huzûr-ı âlîlerine i‘lâm olundu. El-emru li-men-lehü’l-emr. Fî 8 min-Saferi’l-hayr sene [1]172.