Rumeli Sadâreti Mahkemesi 272 Numaralı Sicil (H. 1171-1172/ M. 1758) cilt: 74, sayfa: 409 Hüküm no: 520 Orijinal metin no: [106a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hatice Hatun’un iktidarsız olduğunu beyan ettiği eşi Mehmed Beşe’den boşanma talebi Ma‘rûz, İstanbul’da Şeyh Ebulvefâ mahallesinde sâkine ve zâtı ta‘rîf-i şer‘î ile mu‘arrefe olan Hadice bt. Ebubekir nâm hatun Mumcu İsmail Beşe mübâşeretiyle mahfil-i şer‘iyyâta ihzâr etdirdiği zevci Mehmed Beşe b. Halil muvâcehesinde zevcim mezbûr Mehmed Beşe bin yüz altmış sekiz senesi Şevvâli’nin sekizinci günü beni elli guruş mehr-i müeccel tesmiyesiyle tezevvüc ve duhûl ve nefsimi kirâren ve mirâren mezbûr Mehmed Beşe’ye teslîm edip lâkin mezbûr Mehmed Beşe ınnîn olup bana vusûl ve bikrimi izâleye kādir olmamağla hâlâ nikâhım fesh olunmak murâdımdır deyü da‘vâ etdikde merkūm Mehmed Beşe cevâbında müdde‘iye-i mezbûre Hadice ber-vech-i muharrer mehr-i mezbûr ile zevcesi olduğunu ikrâr ve kendüye mukārenet ve vusûl eyledim deyü müdde‘iye-i mezbûrenin minvâl-i muharrer üzere müdde‘âsını inkâr etdikde bu makūle husûsun teşhîsine kābile ta‘yîn olunan Ümmügülsüm bt. Mehmed ve Emine bt. Abdullah nâm hatunlar kıbel-i şer‘den me’zûn-ı irâe ve nazar eylediklerinde müdde‘iye-i mezbûre hâlâ bikr ve sahîhatü’l-a‘zâ olduğunu haber vermeleriyle işbu târîh-i i‘lâmdan kameriye hitâmına değin zevci merkūm Mehmed Beşe vusûl ve mukārenete mezbûre Hadice te’cîl-i şer‘î ile te’cîl olunduğu huzûr-ı âlîlerine i‘lâm olundu. Fî 8 Saferi’l-hayr sene 1172.