|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 433 Hüküm no: 529 Orijinal metin no: [94b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Ovanes v. Avak ve Hristo v. Ümmüşah adlı zimmilerin ehl-i örf tarafından haksız olarak alınan para ve eşyalarının iadesi
Vilâyet-i Anadolu’da Diyârbekir Kazâsı’na tâbi‘ Eğil nâm kasaba ahâlîlerinden Ovanes v. Avak ve Hristo v. Emirşah nâm zımmîler meclis-i şer‘-i şerîf-i enverde, kasaba-i merkūme beyi olan bâ‘isü hâze’l-kitâb fahrü’l-akrân es-Seyyid Kasım Bey b. Ali nâm kimesne mahzarında her biri ikrâr ve takrîr-i kelâm edip, mezbûr Kasım Bey bundan akdem bir kimesne katl olunmakla Diyârbekir vâlisi beni tecrîm eyledi deyu bizim bi gayri hakkın üç bin guruşumuzu ahz u kabz etmekle ber vech-i muharrer yedimizden ahz u kabz eylediği meblağ-ı mezbûru merkūm es-Seyyid Kasım Bey’den taleb ve da‘vâ eylediğimizde, ol dahi inkâr etmeğin, beynimizde nizâ‘-ı küllî vukū‘undan sonra muslihûn tavassut edip, da‘vâ-yı mezkûremizden bizi mezkûr es-Seyyid Kasım Bey ile nakid yirmi guruş ve mecmû‘u beş yüz seksen guruş kıymetli ve meclis-i sulhda mevcûd on bir kutnî ve bir şal ve bir yün? dâr-ı kutnî ve üç burc alacası ve bir bogasi ve bir sırma dibek ve beş top çit ve üç yemeni çit ve iki kırmızı bogasi ve bir yağmurluk ve bir sîm raht ve bir sîmkeş ve dört şalvar ve üç anteriye ve bir Acem keçesi ve iki eyer ve iki zerre ve yedi kapama üzerine beynimizde akd-i musâlaha eylediklerinde, biz dahi sulh-ı mezbûru kabûl ve bedel-i sulh olan meblağ-ı mezbûr yirmi guruş ile eşyâ-i mezkûreyi mezbûr Kasım Bey yedinden bi’t-tamâm ahz u kabz ettiğimizden sonra mezkûr husûsa müte‘allik cemî‘-i de‘âvî ve mütâlebâtdan biz mezbûr es-Seyyid Kasım Bey’in [zimmetini] ibrâ-i âmm-ı kātı‘ü’n-nizâ‘la ibrâ ve iskāt edip, ol dahi kezâlik bizim zimmetimizi ibrâ ve iskāt eyledi dediklerinde, gıbbe’t-tasdîki’l-mer‘î mâ-vaka‘a bi’t-taleb ketb olundu. Fi’l-yevmi’s-sâbi‘ ve’l-ışrîn min Cumâdelâhire li sene isneteyn ve mi’e ve elf.
Şuhûdü’l-hâl: Fahrü’l-akrân Davud Ağa, Yahya Çelebi b. Ahmed tâbi‘-i efendi, Ahmed Ağa tâbi‘-i efendi, Müezzinzâde Mehmed Çelebi tâbi‘-i efendi.
|