.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 433
Hüküm no: 530
Orijinal metin no: [95a-1]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Ahmed’in ölen kölesinin beytülmâl tarafından terekesinin kendisine teslim olunması

Akdâ kudâti’l-müslimîn evlâ vülâti’l-muvahhidîn ma‘denü’l-fazl ve’l-yakīn râfi‘ü a‘lâmi’ş-şerî‘ati ve’d-dîn vârisu ulûmi’l-enbiyâ ve’l-mürselîn el-muhtas bi mezîdi inâyeti’l-meliki’l-mu‘în Mevlânâ İstanbul Kadısı -zîdet fezâ’iluhû- ve kıdvetü’l-emâsil ve’l-akrân İstanbul’da beytülmâl emîni -zîde kadruhû- tevkī‘-i refî‘-i hümâyûn vâsıl olıcak ma‘lûm ola ki, Ahmed nâm kimesne Edirne’den Dîvân-ı hümâyûnuma arzuhâl edip, bundan akdem abd-i memlûküm fevt oldukda, kendim diyâr-ı âharda olmağla, mukaddemâ İstanbul’da beytülmâl emîni vekîli olan Mehmed, müteveffâ-yı merkūmun muhallefâtını kabz ve akçesin mîrîye teslîm edip ve yedine rûznâmçe temessükü alıp, ba‘dehû gelip vâris-i verâseti isbât ve hüccet-i şer‘iyye ettirip mûcebince beytülmâl emîni vekîli Mehmed’den tahsîl için yedime fermân verilip, merkūm Mehmed’i ihzâr-ı şer‘î edip taleb ettiğimde, yedimde olan sûret-i rûznâmçe ibrâz ettikde fazîletlü İstanbul kadısı, sûret-i rûznâmçeye nazar edip, cânib-i mîrîden verilmek îcâb eder deyu hükm etmekle İstanbul beytülmâlından verilmek bâbında inâyet recâ etmeğin, bundan akdem İstanbul’da Kâtib Sinan mahallesinde fevt olan el-Hâc Hasan’ın muhallefâtı İstanbul’da beytülmâl emîni tarafından kabz ve sülüs hissesinden ihrâcâtı ihrâc olundukdan sonra sahhü’l-bâkī beytülmâl emîni yedinden rûznâmçe-i hümâyûn yüz on bin beş yüz doksan sekiz akçe teslîm olunduğu hüccet-i zahriyye işâret olunup, hâliyâ zuhûr eden vârisi Ahmed ve verâseti isbât ve hüccet-i şer‘iyye mûcebince meblağ-ı mezbûru yedinden taleb edip ve ba‘dehû i‘lâm ve mukaddemâ İstanbul beytülmâl emîni tarafından kabz olunmakla, yine İstanbul’da beytülmâle düşenden, hüccet-i şer‘iyye mûcebince intikāl eden hakkı tedrîc ile verilmek üzre telhîs olunup, arz olundukda mûcebince müteveffâ-yı mezbûrun vârisi zuhûr edip, sâbıkan beytülmâle ahz u kabz olunan meblağ bi hasebi’ş-şer‘î hakk-ı sarîh-i olduğu zâhir ve mütebeyyin olmağla, yine İstanbul beytülmâlından ibtidâ düşenden edâ olunmak üzre, fermân-ı âlîşânım sâdır olmuşdur, buyurdum ki, hükm-i şerîfimle Dergâh-ı mu‘allâm çavuşlarından kıdvetü’l-emâsil ve’l-akrân Osman Çavuş -zîde kadruhû- vardıkda, bu bâbda sâdır olan emrim üzre amel edip, dahi sen ki İstanbul’da Hâssa Beytülmâl Emîni -zîde kadruhû-sun müteveffâ-yı merkūmun vârisi olup, bundan akdem beytülmâle ahz u kabz olunan meblağ-ı mezbûr bi hasebi’ş-şer‘î mezbûr Ahmed’in hakk-ı sarîh-i olduğu zâhir olmağla, yine İstanbul beytülmâlından ibtidâ düşeni bi’t-tamâm edâ edip, işbu emr-i şerîfimin zahrına hüccet-i şer‘iyye ettiresin ve mukaddemâ verilen işbu muhâsebe derkenârıyla iki kıt‘a hüccetleri yedinden alıp, ma‘an hıfz eyleyesin ki hîn-i hesâbda meblağ-ı mezbûr ol hüccetler ile mahsûb olsun. Şöyle bilesin alâmet-i şerîfe i‘timâd kılasın.