.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 434
Hüküm no: 531
Orijinal metin no: [95a-2]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


Yusuf Ağa b. Abdurrahman’ın satın aldığı menzilin kısmen sahipli çıkmasından iadesi

Mahmiye-i İstanbul’da Elvanzâde mahallesinde sâkin Yusuf Ağa b. Abdurrahman nâm kimesne meclis-i şer‘-i şerîf-i enverde Abdullah Ağa b. Mehmed nâm [kimesne] mahzarında ikrâr ve takrîr-i kelâm edip, bundan akdem Fahri nâm hâtun işbu el-Hâc İbrahim b. Abdullah’dan bir mikdâr akçe istikrâz edip, meblağ-ı mezbûr mukābelesinde mahmiye-i mezbûrede Seydî Ömer mahallesinde vâki‘ etrâf-ı erba‘ası es-Seyyid Hüseyin ve Âzime Hâtun ve Hüsamzâde menzilleri ve tarîk-i âm ile mahdûd hâriciye ve dâhiliyesi büyût-ı adîdeyi müştemil mülk menzilini, bundan akdem bi tarîki’l-istiğlâl bey‘ edip senesi tamâmında edâ edemezsem işbu İbrahim [b.] Sefer nâm kimesne vekâlet-i devriye ile vekîlim olup bey‘ ve semeninden deynimi edâ eylesin demekle, mezbûr İbrahim dahi ba‘de[hû] müftî’l-vakt menzil-i mezbûru merkūm Abdullah Ağa’ya bey‘ edip, ol dahi bana beş bin yüz guruşa bey‘ etmişdi. Lâkin hâlâ menzil-i mezkûrun dâhiliyesine müstahıkk-ı âhar çıkıp huzûr-ı hâkimü’ş-şer‘de vech-i şer‘î üzre muvâcehemde müdde‘âsını isbât ve hükm-i hâkimü’ş-şer‘le ahz u kabz etmeğin, menzil-i mezkûr ma‘yûb olmağla bi’t-terâzî menzil-i mezkûrun nısfını mesfûr Abdullah Ağa’ya red ve teslîm, ol dahi mezbûr İbrahim ve merkūm İbrahim dahi mezbûr el-Hâc İbrahim’e vech-i meşrûh üzre kendiye istiğlâl olmağla red ve teslîm, mezbûr el-Hâc İbrahim dahi ber vech-i muharrer ahz u kabz eyledim dedikde, gıbbe’t-tasdîki’ş-şer‘î [ketb] olundu. Fi’l-yevmi’s-sânî min Recebi’l-mürecceb sene 1102.


Şuhûdü’l-hâl: Mustafa Efendi b. ( ), Mehmed Beşe el-mübâşir, Mehmed Ağa b. Mehmed, Ahmed Ağa b. Mustafa, Ahmed Efendi b. Durmuş.