|
Bab Mahkemesi 54 Numaralı Sicil (H. 1102 / M. 1691) cilt: 20, sayfa: 435 Hüküm no: 533 Orijinal metin no: [95b-2] Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.
Müslüman olan Kıptiler’den cizye alınmaması
Akdâ kudâti’l-müslimîn evlâ vulâti’l-muvahhidîn ma‘denü’l-fazl ve’l-yakīn râfi‘ü a‘lâmi’ş-şerî‘ati ve’d-dîn vârisu ulûmi’l-enbiyâ-i ve’l-mürselîn hüccetü’l-hakkı ale’l-halkı ecma‘în el-muhtas bi mezîdi inâyeti’l-meliki’l-mu‘în Mevlânâ İstanbul Kadısı -zîdet fezâ’iluhû- tevkī‘-i refî‘-i hümâyûn vâsıl olıcak ma‘lûm ola ki, kazâ-i mezbûra tâbi‘ Balat’da sâkine kıbtiyân tâifesinden el-Hâc Osman oğlu Mustafa ve sâirleri Dîvân-ı Hümâyûnuma arzuhâl sunup, mezbûrlar cemâ‘at-i müslimînden ve ehl-i perde olup, cemâ‘at-i müslimîn ile evkāt-ı hamseyi edâ ve salavât-ı şerîfe ve tilâvet-i Kur’ân-ı azîmü’ş-şân’a müdâvemet ve ba‘zıları haccü’l-harameyn olup, ehl ü iyâllerini harâmdan hıfz edip, hilâf-ı şer‘-i şerîf rencîde ve remîde olunmak îcâb eylemez iken, hilâf-ı şer‘ mezbûrlardan cizye taleb olunup rencîde ve remîde eyledikleri ve bu bâbda fetvâ-yı şerîfleri dahi olduğunu bildirip şer‘le amel olunup, hilâf-ı şer‘-i şerîf ol makūle ehl-i İslâm’dan olanlarından hilâf-ı şer‘-i şerîf cizye talebiyle kıbtiyân cizyedârlarına rencîde ve remîde ettirilmemek bâbında emr-i şerîfim verilmek recâ eyledikleri ecilden, imdi ehl-i İslâm’dan olmağla harâc taleb olunmaya deyu fermân-ı âlîşânım sâdır olmuşdur. Buyurdum ki hükm-i şerîfimle vardıkda, bu bâbda sâdır olan emrim üzre amel edip dahi husûs-ı mezbûru şer‘le takayyüd edip göresin. Fi’l-hakīka mezbûr cemâ‘at-i müslimînden ve ehl-i perde ve evkāt-ı hamseyi edâ edip ehl-i İslâm’dan oldukları zâhir ise ol bâbda muktezâ-yı emr-i şer‘-i kavîm ile âmil olup, mezbûrları ehl-i İslâm ve cemâ‘at-i müslimînden olanlarından hilâf-ı şer‘-i şerîf cizye talebiyle rencîde ve remîde ettirmeyip, husûs-ı mezbûr için tekrâr şikâyet olunmalı eylemeyesin, şöyle bilesin alâmet-i şerîfe i‘timâd kılasın. Tahrîren fi’l-yevmi’r-râbi‘ şehri Cumâdelâhire li sene isneteyn ve mi’e ve elf. Be-makām-ı Kostantıniyye el-mahrûse.
|