.:: İstanbul Kadı Sicilleri ::.


Bab Mahkemesi 54 Numaralı Sicil (H. 1102 / M. 1691)
cilt: 20, sayfa: 436
Hüküm no: 534
Orijinal metin no: [95b-3]
Bu defter İstanbul 2010 Avrupa Kültür Başkenti Ajansı ve İslam Araştırmaları Merkezi (İSAM) ortaklığı ile hazırlanmıştır.


İsmihân ve Sâliha’nın kötü halleri sebebiyle mahalleden çıkartılması

Devletlü mürüvvetlü sultânım hazretleri sağ olsun, Bu kulları İstanbul’da Sinan Paşa mahallesi fukarâlarından olup ve yine mahalle-i mezbûre sâkinelerinden İsmihân ve Sâliha nâm avratlar için mescidimize kâğıd bırakılıp, bu kulların ihrâkdan havfımız olmağla, fazîletlü İstanbul efendisi vukū‘ üzre teftîş edip, sultânıma vukū‘u üzre arz ve i‘lâm bâbında fermân sultânımındır. Mahalle fukarâları. İstanbul kadısı fazîletlü efendi şer‘le görüp mahallesi ahâlîsinden tefahhus edip arz eyleyesin deyu buyuruldu. Ma‘rûz-ı dâ‘îleri budur ki, Fermân-ı şerîfleri üzre derûn-ı arzuhâlde mastûr olan mezbûre İsmihân Hâtun’un mahallesi ahâlîsinden cemm-i gafîr ve cem‘-i kesîrden mezbûrenin keyfiyeti tefahhus ve suâl olundukda, mezbûre İsmihân’ın nâ-mahremden ictinâbı olmayıp dâimâ fesâd üzredir deyu meclis-i şer‘de mezbûrenin muvâcehesinde sû’-i hâlini alâ tarîki’ş-şehâde haber vermişlerdir, fermân men-lehü’l-emrindir.