Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 74 Hüküm no: 2 Orijinal metin no: [1b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mustafa Çelebi b. Şa‘ban’ın evini Ayşe bt. Abdullah’a sattığı Mahmiye-i İstanbul’da Müftî Ali Çelebi Mahallesi’nde sâkin Mustafa Çelebi b. Şa‘ban nâm kimesne mahfil-i kazâda işbu râfi‘atül-kitâb Âişe bt. Abdullah nâm hatun mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan el-Hâc Kaya oğlu el-Hâc Mehmed Vakfı olan harâbe menzil arsası ve bir tarafdan Emine Hatun mülkü ve iki tarafdan tarîk-i âm ile mahdûd bir bâb oda ve bir matbah ve bir sofa ve bir tahta-pûş ve bir kenîf ve havluyu müştemil mülk menzilimi tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûre Âişe Hatun’a yüz otuz beş guruşa bey‘ ve temlîk ve teslîm edip ol dahi ber-vech-i muharrer iştirâ ve temellük ve tesellüm ve kabz u kabûl eylediğinden sonra semeni olan meblağ-ı mezbûr yüz otuz beş guruşu mezbûre Emine Hatun yedinden tamamen ahz u kabz eyledim baʻde’l-yevm menzil-i mahdûd-ı mezkûr cemî‘ müştemilâtı ile mezbûre Emine Hatun’un mülk-i müşterâsı ve hakk-ı sırfı olmuşdur. Keyfe-mâ-teşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî-gurreti şehri Rebîʻülâhir sene 1121 Şuhûdü’l-hâl: İsmail Çelebi b. el-Hâc Mustafa, Mehmed Çelebi b. Usta Hasan, Hasan Çelebi b. Abdullah, Derzi Ebûbekir Çelebi b. ( ), İmâm Mehmed Efendi b. ( ), Hasan Beşe b. Mustafa, Mustafa b. Şa‘ban ve gayruhum mine’l-huzzâr.