Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 75 Hüküm no: 3 Orijinal metin no: [1b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Rum Patriki Gebrenyus v. Yorgi’nin Dimitri v. Hastaki, Yani v. Rayka ve Avangelyos v. Nikola ile Yuvan adlı papaslara olan borcunu ödemesi Mahmiye-i İstanbul’da Edirnekapısı dâhilinde vâki‘ kilisede mütemekkin papaslardan Dimitri v. Hasnaki ve Parmakkapı’da vâki‘ kilise papaslarından Yani v. Rika ve Kumkapı’da vâki‘ kilisede papas olan Avangelinus v. Nikola dîvân-ı hazret-i sadr-ı âzamîde ma‘kūd mahfil-i kazâda mahmiye-i mezbûrede vâki‘ Rum Patriki Gebrenyus v. Yorgi mahzarında her biri üzerine da‘vâ ve takrîr-i kelâm edip târih-i kitâbdan bir sene mukaddem merkūm patrike beynimizde ma‘lûme keşişhânede bin dört yüz guruşumuzu ikrâz ve teslîm ve her birinin vezn ve mikdârı beynimizde ma‘lûm şeker ve kahvemizi üç yüz guruşa bey‘ ve teslîm ol dahi ber-vech-i muharrer iktirâz ve kabz ve iştirâ ve tesellüm etmekle suâl olunup min-haysü’l-mecmû‘ zimmetinde hakkımız olan bin yedi yüz guruşun alıverilmesi matlûbumuzdur dediklerinde gıbbe’s-suâl ve akībe’l-inkâr müdde‘ûn-ı merkūmûndan müdde‘âlarını mübeyyine beyyine taleb olundukda mahmiye-i mezbûrede Fenerkapısı kurbünde vâki‘ kilise papaslarından Nikola v. Yorgi ve Meryemana Kilisesi’nde vâki‘ Papa Hristodoli v. Kiryaki nâm râhibler meclis-i mezkûra hâzırân olup isre’l-istişhâd fi’l-hakīka işbu müdde‘ûn-ı merkūmûn târih-i kitâbdan bir sene mukaddem zikr olunan keşişhânede bin dört yüz guruşlarını bizim huzûrumuzda patrik-i merkūm Gebrenyus’a ikrâz ve teslîm ve beynlerinden ma‘lûm şeker ve kahvelerini dahi üç yüz guruşa bey‘ ve teslîm merkūm Gebrenyus [2a] dahi bizim huzûrumuzda iktirâz ve kabz ve tesellüm ve iştirâ ve kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm meblağ-ı merkūm cem‘an bin yedi yüz guruşu müdde‘ûn-ı merkūmûna edâ ve teslîme merkūm Gebrenyus’a tenbîh-birle mâ-vaka‘a bi’t-taleb ketb olundu. Fî 29 min-şehri Rebî‘ülevvel sene 1121 Şuhûdü’l-hâl: el-Hâc Mustafa Efendi Kethüdâ-yı Efendi, el-Hâc Mustafa tâbi‘-i hazret-i efendi, Süleyman Ağa-yı Ser-muhzırân, Çukadâr Receb Beşe b. ( ) ve gayruhum mine’l-huzzâr.