Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 76 Hüküm no: 4 Orijinal metin no: [2a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Hacı Ali b. Abdullah’ın Hacı Ahmed b. Mehmed’den satın aldığı köle Abdullah b. Saltana’nın hür olduğunu ispat etmesi üzerine köle bedeli olan parayı sulh yoluyla Hacı Ahmed’den geri aldığı Mahmiye-i İstanbul’da Sarıdemirci Mahallesi’nde sâkin el-Hâc Ali b. Abdullah tarafından husûs-ı âti’l-beyâna vekîl-i müsecceli olan Hasan Çelebi b. Mehmed nâm kimesne meclis-i şer‘-i şerîfde işbu râfi‘u’l-kitâb el-Hâc Ahmed b. Mehmed nâm kimesne bi’l-vekâle ikrâr ve takrîr-i kelâm edip mezbûr el-Hâc Ahmed bundan akdem orta boylu açık kaşlı gök elâ gözlü Abdullah b. Saltana’yı abd-i memlûkü olmak üzere yüz yirmi beş guruşa müvekkilim mezbûr el-Hâc Ali’ye bey‘ ve teslîm ol dahi baʻde’l-iştirâ meblağ-ı mezbûr yüz yirmi beş guruşu mezbûr el-Hâc Ahmed müvekkil-i mezbûr el-Hâc Ali’den ahz u kabz eylediğinden sonra mezbûr Abdullah yedimde olan hüccet nâtıka olduğu üzere hürrü’l-asl olduğunu şuhûd-ı udûl ile mezbûr el-Hâc Ali muvâcehesinde isbât ve hürriyetine hükm-i şer‘î lâhık olup sebîli tahliye olunmağın müvekkil-i mezbûr el-Hâc Ali semen olmak üzere medfû‘u olan meblağ-ı mezbûr yüz yirmi beş guruşu mezkûr el-Hâc Ahmed’den taleb ve da‘vâ etmekle beynlerinde nizâ‘-ı küllî vukū‘undan sonra muslihûn tavassut edip meblağ-ı mezbûr da‘vâsında mezkûr el-Hâc Ahmed müvekkil-i mezbûr ile yüz on iki guruşu sulh oldukda müvekkil-i mezbûr dahi sulh-ı mezbûru kabûl ve bedel-i sulh olan meblağ-ı mezbûr yüz on iki guruşu mezbûr el-Hâc Ahmed’den bi’t-tamam ahz u kabz eyledi dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 14 min-şehri Rebî‘ülevvel sene 1121 Şuhûdü’l-hâl: Mehmed Efendi b. ( ), el-Hâc Mustafa b. Hüseyin Kethüdâ-yı Efendi, el-Hâc Mehmed b. ( ), Hüseyin Beşe Çukadâr ve gayruhum mine’l-huzzâr.