Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 76 Hüküm no: 5 Orijinal metin no: [2a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Mimar Kemal Camii’nin minare ve şerefesi ile harap mahallerinin tamiri ve iki yeni odanın da ilaveten yapılması Husûs-ı âti’z-zikrin mahallinde keşf ve tahrîri için fermân-ı âlî sâdır olmağın imtisâlen-leh cânib-i şer‘den Mevlânâ Mehmed Efendi b. Yusuf ta‘yîn ve irsâl olunup ol dahi hâssa mi‘mârlarından Hasan Halîfe b. Mahmud ile Dârü’s-sa‘âdeti’l-aliyye Kostantıniyyeti’l-mahmiye mahallâtından Mi‘mâr Kemal Mahallesi’nde vâki‘ ashâb-ı hayrâtdan merhûm Mi‘mâr Kemal câmi‘-i şerîfi’ne varıp zeyl-i vesîkada mektûbü’l-esâmî Müslimîn huzûrunda akd-i meclis-i şer‘-i kavîm eyledikde hâlâ câmi‘-i mezkûr vakfı mütevellîsi olan işbu râfi‘u’l-vesîka Halil Ağa b. Mustafa nâm kimesne meclis-i ma‘kūd-ı mezkûrda takrîr-i kelâm ve tâʻbir ani’l-merâm edip işbu câmi‘-i şerîf minâresinin külâhı ve şerefesi ve şerefeye gelinceye değin inhidâma meyleden mevâzi‘i ve câmi‘-i mezkûrun abdesthâne ve kenîfleri ve inhidâma meyleden mevâzi‘-i adîdesi ta‘mîre eşedd-i ihtiyâc ile muhtâc olup ve câmi‘-i mezkûrun sofası dehlîzi tahtında tarîk-i âm tarafında iki bâb sagīr dükkân müceddeden binâ olunup ecr-i misli ile îcâr olunmak her vechile münâsib ve vakfa enfa‘ ve evlâ olmağın keşf ve mu‘âyene olunup mâl-ı vakf-ı mezbûr ile iki bâb sagīr oda ve mevâzi‘-i mezkûrenin tecdîd ve ta‘mîrine cânib-i şer‘den bana izin verilmek murâdımdır dedikde baʻde’l-keşf ve’l-mu‘âyene zikr olunan minârenin ve abdesthâne ve kenîflerin ve inhidâma meyleden mevâzi‘in ta‘mîre muhtâc olup ve mahall-i mezkûrda iki bâb sagīr oda binâ olunmak her vechile münâsib ve vakfa enfa‘ ve evlâ olduğunu mi‘mâr-ı mezbûr haber verip ve zeyl-i vesîkada muharrerü’l-esâmî bî-garaz Müslimîn dahi icmâ‘ u ittifâk eylediklerini mevlânâ-yı mezbûr mahallinde ketb ü tahrîr ba‘dehû ma‘an ba‘s olunan Süleyman b. Abdullah ile meclis-i şer‘a gelip her biri alâ-vukū‘ihî inhâ ve takrîr etmeğin minvâl-i muharrer üzere tecdîd ve ta‘mîre mütevellî-i merkūm Halil Ağa’ya kıbel-i şer‘den izin verilmeğin mâ-vaka‘a bi’t-taleb ketb olundu. Fî 7 min-şehri Rebîʻülâhir sene 1121 Şuhûdü’l-hâl: el-Hâc Hüseyin Efendi b. Kalender el-İmâm, Ahmed Efendi b. Mustafa el-Müezzin, Hasan Efendi b. Ebûbekir, Abdülkerim Efendi b. el-Hâc Mustafa, İsmail Ağa b. Abdullah, Molla Habib b. Receb, el-Hâc Mehmed Ağa b. Derviş, Mehmed Ağa b. el-Hâc Salih, el-Hâc Ali b. Mehmed, Mehmed Beşe b. Hamza, Mehmed Çelebi b. Hüseyin, Mehmed Çelebi b. Ahmed, Mehmed Çelebi b. Osman ve gayruhum mine’l-huzzâr.