Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 77 Hüküm no: 6 Orijinal metin no: [2a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Zoyi bt. Aleksi’nin evini Yanaki v. Panayot’a sattığı Mahmiye-i İstanbul’da Tevkī‘î Ca‘fer Çelebi Mahallesi sâkinelerinden olup zâtı mahalle-i mezbûre sükkânından Hasan Çelebi b. Mehmed nâm kimesneler ta‘rîfleriyle mu‘arrefe olan Zoyi bt. Aleksi nâm Nasrâniye meclis-i şer‘-i şerîf-i enverde işbu bâ‘isü’s-sifr Yanaki v. Panayot nâm zimmî muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Kevâkibzâde menzili ve bir tarafdan Yorgi zimmî menzili ve bir tarafdan Yuvan zimmî menzili ve bir tarafdan tarîk-i âm ile mahdûd fevkānî iki bâb oda ve bir mikdâr dehlîz ve bir matbah ve tahtânî bir bâb oda ve bir zîr-i zemîn ve bir kenîfi müştemil mülk menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile mezbûr Yanaki’ye sekiz yüz yirmi guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr sekiz yüz yirmi guruşu mezbûr Yanaki yedinden tamamen ahz u kabz eyledim baʻde’l-yevm menzil-i mahdûd-ı mezkûr merkūm Yanaki’nin mülk-i müşterâsıdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-şehri Rebîʻülâhir sene 1121 Şuhûdü’l-hâl: Hasan Çelebi b. Mehmed, Hüseyin Çelebi b. Hasan, Hasan Çelebi b. Abdullah, İbrahim Beşe b. Halil, İsmail Beşe b. Hüseyin, …? İmâmı Osman Efendi b. Mehmed, Mustafa Çelebi b. el-Hâc Mehmed, Mehmed Beşe b. Ahmed Papa Yani v. Rayka, Zaharya v. Dimitri, Dimitri v. Hristo.