Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 78 Hüküm no: 7 Orijinal metin no: [2b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Halil Beşe b. Muslu’nun Veziriazâm Kara Mustafa Paşa Vakfı’dan Yedikule’deki selhhane için Kasablar Kethüdası Hacı Süleyman b. Ahmed’e verdiği elli guruşun geri alınması Mahmiye-i İstanbul’da el-Hâc İsa Mahallesi’nde sâkin işbu râfi‘u’l-kitâb Halil Beşe b. Muslu nâm kimesne meclis-i şer‘-i şerîf-i enverde Kasablar Kethüdâsı el-Hâc Süleyman b. Ahmed’in sulbî oğlu ve tarafından husûs-ı âti’l-beyâna vekîl olduğu el-Hâc Mehmed b. el-Hâc Mustafa ve Hasan Beşe b. Hüseyin şehâdetleriyle şer‘an sâbit olan İsmail Çelebi mahzarında üzerine da‘vâ ve takrîr-i kelâm edip vezîriazam-ı sâbık Kara Mustafa Paşa Vakfı’ndan olup mahmiye-i mezbûrede Yedikulekapısı hâricinde vâki‘ selhhânelerden altıncı olmak üzere bir bakar selhhânesi gediğinin arzını mütevellîsinden alıvermek için müvekkil-i mezbûr bundan akdem bi-tarîkı’r-rüşve benden elli guruş ahz u kabz etmeğin hâlâ meblağ-ı mezbûru istirdâd murâd ederim deyicek mezbûra suâl olunup meblağ-ı mezbûr elli guruşu müvekkil-i mezbûr bana redd ü teslîm etmek üzere vekîl-i merkūma tenbîh olunmak matlûbumdur dedikde gıbbe’s-suâl vekîl-i mezbûr cevâbında fi’l-vâki‘ meblağ-ı mezbûr elli guruşu müdde‘î-i mezbûr yedinden ber-vech-i muharrer müvekkil-i mezbûrun ahz u kabz eylediğini ikrâr u i‘tirâf etmeğin mûcebiyle meblağ-ı mezbûr elli guruşun reddiyle baʻde’l-hükm mâ-vaka‘a bi’t-taleb ketb olundu. Fî 24 min-şehri Rebî‘ülevvel sene 1121 Şuhûdü’l-hâl: Mustafa Çelebi b. Şa‘ban, Ali b. İvaz, Hasan b. Mustafa, Hasan b. Abdullah, Ali b. Bâli ve gayruhum mine’l-huzzâr.