Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 83 Hüküm no: 13 Orijinal metin no: [3b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Efendi b. Abdülkerim’in Ferruh bt. Abdullah’ın terekesindeki hakkına karşılık Ferruh’un kocası İbrahim Çelebi’den 21 guruş aldığı Mahmiye-i İstanbul’da Tevkī‘î Ca‘fer Mahallesi’nde sâkine iken bundan esbak vefât eden Ferruh bt. Abdullah hatunu i‘tâk eden Emetullah Hatun bt. Abdülaziz Efendi’nin li-ebeveyn er karındaşı Abdülkerim Efendi’nin oğlu Ahmed Efendi nâm kimesne meclis-i şer‘-i şerîf-i enverde işbu râfi‘u’l-kitâb müteveffât-ı mezkûre Ferruh’un zevci ve terekesine vâzı‘u’l-yed olan İbrahim Çelebi b. Ahmed nâm kimesne muvâcehesinde ikrâr-ı tâm ve takrîr-i kelâm edip müteveffât-ı mezkûre Ferruh’un terekesinde nukūd olmamağla şerâit-i sıhhat-i sulhü hâvî şürût-ı müfsideden ârî ale’t-tahârüci’ş-şer‘î nakden rub‘ hissemden ezyed olduğu hâlde mezkûr İbrahim Çelebi bana yirmi bir guruş def‘ u teslîm ben dahi yedinden ahz u kabz eylediğimden sonra müteveffât-ı mezkûre Ferruh’un huliy ve melbûsât ve mefrûşât ve evânî-i nuhâsiye ve gayr-ı nuhâsiye ve bi’l-cümle ism-i mâl ıtlâk olunur terekesine müte‘allika âmme-i da‘vâ ve kâffe-i mutâlebâtdan mezkûr İbrahim Çelebi’nin zimmetini ibrâ-i âmm-ı râfi‘u’l-hısâm ile ibrâ ve iskāt eyledim baʻde’l-yevm mezkûr İbrahim Çelebi ile tereke-i müteveffât-ı mezkûreden rub‘ hisseme müte‘allika da‘vâ ve nizâ‘ım kalmadı dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu. Fî 7 min-Rebîʻülâhir sene 1121 Şuhûdü’l-hâl: Mehmed Efendi b. Süleyman, Mustafa Çelebi b. Abdullah tâbi‘-i Uşşâkīzâde, Mustafa Çelebi b. Ahmed tâbi‘-i Şi‘rânîzâde, Süleyman Efendi b. el-Hâc Ömer el-Müezzin, Mehmed Çelebi b. Halil, Abdullah Çelebi b. Abdurrahman, Mehmed Efendi Nâib Uşşâkīzâde, Ömer Çelebi Çukadâr, Hasan b. Abdullah, el-Hâc Süleyman b. Halil, Hüseyin Çelebi b. Hasan, Mustafa Çelebi b. Şa‘ban, Ali Çelebi b. İvaz ve gayruhum mine’l-huzzâr.