Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 83 Hüküm no: 14 Orijinal metin no: [3b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Dimitri v. Hastaki, Papa Yani v. Rayka ve Avangelyos v. Nikola papasların Rum Patriği Gebrenyus v. Yorgi’de olan alacaklarını tahsil ettikleri Mahmiye-i İstanbul’da Edirnekapısı dâhilinde vâki‘ kilise papaslarından Dimitri v. Hasnaki ve Papa Yani v. Rika? ve Kumkapı kilisesinde papas olan Avangelinus v. Nikola mahmiye-i mezbûrede Rum Patriki olan rafi‘u hâze’s-sifr Gebrenyus v. Yorgi’nin karındaşı ve tarafından husûs-ı âti’l-beyâna vekîl olduğu Yorgaki v. Yani ve Yani v. Manol nâm zimmîler şehâdetleriyle sâbit olan Dimitraki nâm zimmî mahzarında her biri ikrâr ve takrîr-i kelâm edip yedimizde olan hüccet nâtıka olduğu üzere müvekkil-i merkūm Gebrenyus Patrik zimmetinde cihet-i karzdan bin dört yüz guruş ve beynimizde ma‘lûm şeker ve kahve semeninden dahi üç yüz guruş ki cem‘an bin yedi yüz guruş hakkımız vardır deyü da‘vâ ve isbât ve hüküm ve hüccet olunup meblağ-ı mezbûru bize edâya merkūm patrike tenbîh dahi olunmağla hâlâ patrik-i merkūm Gebrenyus meblağ-ı merkūm bin yedi yüz guruşu bize edâ ve teslîm biz dahi yedinden ahz u kabz eyledik min-ba‘d meblağ-ı mezbûrdan zimmetinde bir akçe ve bir habbe hakkımız bâkī kalmamışdır dediklerinde gıbbe’t-tasdîkı’l-mer‘î mâ-vaka‘a bi’t-taleb ketb olundu Fî 3 min-şehri Rebîʻülâhir sene 1121 Şuhûdü’l-hâl: Mehmed b. el-Hâc Veli, Mehmed b. Mustafa, İbrahim b. Ali, Ahmed b. Mustafa, el-Hâc Mehmed b. Ahmed, el-Hâc Mehmed b. Yusuf el-Muhzır Galatalı, Mustafa b. Şa‘ban ve gayruhum mine’l-huzzâr.