Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 87 Hüküm no: 20 Orijinal metin no: [4a-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avadik v. Bedros’un evini Ezmarağda bt. Yorgaki’ye sattığı Mahmiye-i İstanbul’da Samatya kurbünde el-Hâc Hüseyin Mahallesi’nde sâkin Avadik v. Bedros nâm zimmî meclis-i şer‘-i şerîf-i enverde işbu bâ‘isetü’l-vesîka Ezmarağda bt. Yorgaki nâm Nasrâniye muvâcehesinde ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Hasnaki nâm zimmî mülkü ve bir tarafdan Drako zimmî mülkü ve bir tarafdan baʻzan Fıçıcı Yorgi mülkü ve baʻzan Praloga zimmî mülkü ve bir tarafdan tarîk-i âm ile mahdûd fevkānî ve tahtânî üç bâb oda ve iki matbah ve iki sofa ve bir mahtab ve bir kenîf ve müşterek bi’r-i mâ ve iki kenîf ve havluyu müştemil menzilimi bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i kat‘î ile altı yüz on yedi guruşa mezbûre Ezmarağda’ya bey‘ ve temlîk ve teslîm eylediğimde ol dahi ber-vech-i muharrer iştirâ ve kabz ve tesellüm ve kabûl eyledikden sonra semen-i mezbûru tamamen yedinden ahz u kabz eyledim min-ba‘d menzil-i mahdûd-ı mezbûr merkūme Ezmarağda’nın mülk-i müşterâsı olup benim kat‘â alâka ve medhalim kalmamışdır dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 8 min-şehri Rebîʻülâhir sene 1121 Şuhûdü’l-hâl: Ahmed Efendi b. Esad el-İmâm, Mustafa Halîfe b. İbrahim el-Müezzin, İbrahim Çelebi b. Mehmed, Mehmed Çelebi b. İbrahim, Ali b. Mustafa, İsmail Çelebi b. Mehmed, Mustafa Çelebi b. Şa‘ban, Abdullah b. Mustafa ve gayruhum mine’l-huzzâr. Papa Viyolo v. Lambo, Papa Kozma v. Kostantin, Londari v. Metoli, Monalaki v. Miho, Hasnaki v. İstati, Sirnus v. Kostantin, Yorgaki v. ( ), Dimitri v. Nikola.