Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 87 Hüküm no: 21 Orijinal metin no: [4a-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Avadik v. Bedros’un Ali Çelebi’nin para vakfından aldığı borcunu ödeyip rehin bıraktığı evini teslim aldığı Mahmiye-i İstanbul’da Samatya kurbünde el-Hâc Hüseyin Mahallesi’nde sâkin olup Ali Çelebi nâm sâhibü’l-hayrın nukūd-ı mevkūfesine mütevellî olan Ahmed Efendi b. Muharrem nâm kimesne meclis-i şer‘-i şerîf-i enverde Avadik v. Bedros muvâcehesinde ikrâr ve takrîr-i kelâm edip mezbûr Avadik yedinde mülkü olan mahalle-i mezbûrede vâki‘ bir tarafdan Hasnaki zimmî mülkü ve bir tarafdan Drako zimmî mülkü ve bir tarafdan baʻzan Fıçıcı Yorgi mülkü ve baʻzan Praloga zimmî mülkü ve bir tarafdan tarîk-i âm ile mahdûd bir bâb fevkānî oda ve matbah ve kenîf ve müşterek su kuyusunu müştemil mülk menzilini bundan akdem bi-tarîkı’l-istiglâl yüz guruşa bana bey‘ ve teslîm ben dahi mâl-ı vakf-ı mezbûr ile iştirâ etmişidim hâlâ mezbûr Avadik zimmî semen-i mezbûr yüz guruş beynimizde ma‘lûm dört aylık icâreyi bana teslîm ben dahi yedinden ahz u kabz edip fekk-i rehn etmeğin min-ba‘d menzil ke’l-evvel mezbûr Avadik zimmînin mülküdür dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 7 min-şehri Rebîʻülâhir sene 1121 Şuhûdü’l-hâl: <<İmâm es-Seyyid Ali Efendi b. el-Hâc İbrahim, es-Seyyid el-Hâc İbrahim Efendi b. Abdülfettâh, es-Seyyid Abdülbâki Çelebi b. Musa Attâr, Kahveci Kara Mehmed Halîfe b. Veli, İsmail Çelebi b. Muslu, el-Hâc İbrahim Çelebi b. Mehmed, Molla Hasan el-Müezzin, Mehmed Çelebi b. el-Hâc Musa ve gayruhum mine’l-huzzâr.>> Ahmed Efendi b. Esad el-İmâm, Mustafa Halîfe b. İbrahim el-Müezzin, İbrahim Çelebi b. Mehmed, Mehmed Çelebi b. İbrahim, Ali Çelebi b. Mustafa, İsmail Çelebi b. Mehmed ve gayruhum mine’l-huzzâr.