Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 88 Hüküm no: 22 Orijinal metin no: [4a-6] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mustafa’nın evinin yarısını damadı Mustafa Ağa b. Abdullah’a sattığı Mahmiye-i İstanbul’da Gül Câmi‘-i şerîfi Mahallesi’nde sâkin sâbıkā sandık emîni olan Ahmed Ağa b. Mustafa nâm kimesne meclis-i şer‘-i şerîf-i enverde damadı işbu râfi‘u’l-kitâb Mustafa Ağa b. Abdullah tarafından husûs-ı âti’z-zikri tasdîka vekîl-i sâbitü’l-vekâlesi olan el-Hâc Mustafa b. el-Hâc Musa nâm kimesne mahzarında ikrâr-ı tâm ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Emetullah nâm hatun mülkü [4b] ve bir tarafdan cidâr-ı hısn ve bir tarafdan Emîr Mustafa odaları ve bir tarafdan tarîk-i âm ile mahdûd hâriciyesi fevkānî bir bâb oda ve bir sofa ve kenîf ve bi’r-i mâyı ve dâhiliyesi fevkānî iki bâb oda ve iki sofa ve bir tahta-pûş ve dehlîz ve tahtânî bir bâb oda ve kiler ve bir matbah ve bir kârgîr mahzen ve bir ahır ve bi’r-i mâ ve bir mikdâr bahçeyi müştemil mülk menzilimin nısf-ı şâyi‘ini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile dâmadım merkūm Mustafa Ağa’ya altı yüz guruşa bey‘ ve temlîk ve teslîm eylediğimde ol dahi ber-vech-i muharrer iştirâ ve temellük ve tesellüm ve kabz u kabûl ettiğinden semeni olan meblağ-ı mezbûr altı yüz guruşu merkūm Mustafa Ağa bana def‘ u teslîm ben dahi yedinden bi’t-tamam ve’l-kemâl ahz u kabz eyledim <> fîmâ-ba‘d menzil-i mahdûd-ı mezkûrun nısf-ı şâyi‘i dâmadım merkūm Mustafa Ağa’nın mülk-i müşterâsı ve hakk-ı sırfı olmuşdur keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-şehri Rebîʻülâhir sene 1121 Şuhûdü’l-hâl: İmâm es-Seyyid Ali Efendi b. el-Hâc İbrahim, es-Seyyid el-Hâc İbrahim b. Abdülfettâh, es-Seyyid Abdülbâki Çelebi b. ( ) Attâr, Kahveci Kara Mehmed Halîfe b. Veli, İsmail Çelebi b. Muslu, el-Hâc İbrahim Çelebi b. Mehmed, Molla Hasan el-Müezzin, Mehmed Çelebi b. el-Hâc Musa, Mustafa Çelebi b. Şa‘ban, Ali b. İvaz ve gayruhum mine’l-huzzâr.