Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 89 Hüküm no: 23 Orijinal metin no: [4b-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ahmed Ağa b. Mustafa’nın evinin yarısını kızı Zeyneb’e sattığı Mahmiye-i İstanbul’da Gül Câmi‘-i şerîfi Mahallesi’nde sâkin sâbıkā sandık emîni olan Ahmed Ağa b. Mustafa nâm kimesne meclis-i şer‘-i şerîf-i enverde sulbiye kebîre kızı Zeyneb nâm hatun tarafından husûs-ı âti’l-beyânı tasdîka vekîl-i sâbitü’l-vekâlesi olan el-Hâc Mustafa b. el-Hâc Musa nâm kimesne mahzarında ikrâr ve takrîr-i kelâm edip akd-i âti’z-zikrin sudûruna değin yedimde mülk ve hakkım olup mahalle-i mezbûrede vâki‘ bir tarafdan Emetullah nâm hatun mülkü ve bir tarafdan cidâr-ı hısn ve bir tarafdan Emîr Mustafa Bey odaları ve bir tarafdan tarîk-i âm ile mahdûd hâriciyesi fevkānî bir bâb oda ve bir sofa ve kenîf ve bir bi’r-i mâ ve dâhiliyesi fevkānî iki bâb oda ve iki sofa ve bir tahta-pûş ve dehlîz ve tahtânî bir bâb oda ve bir kiler ve bir matbah ve bir kârgîr mahzen ve bir ahır ve bi’r-i mâ ve kenîf ve bir mikdâr bahçeyi müştemil mülk menzilimin nısf-ı şâyi‘ini tarafeynden îcâb ve kabûlü hâvî şürût-ı müfsideden ârî bey‘-i bâtt-ı sahîh-i şer‘î ile kızım müvekkile-i mezbûreye altı yüz guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabûl eylediğinden sonra semeni olan meblağ-ı mezbûr altı yüz guruş mutâlebesinden kızım müvekkile-i mezbûrenin zimmetini ibrâ-i âmm-ı kātı‘u’n-nizâ‘la ibrâ ve iskāt eyledim baʻde’l-yevm menzil-i mahdûd-ı mezkûrun nısf-ı şâyi‘i kızım müvekkile-i mezbûrenin mülk-i müşterâsı ve hakk-ı sırfı olmuşdur keyfe mâ yeşâ ve tehtâr mutasarrıfe olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-şehri Rebîʻülâhir sene 1121 Şuhûdü’l-hâl: Eş-şâhidûnü’s-sâbıkūn, eş-şâhidûnü’s-sâbıkūn, eş-şâhidûnü’s-sâbıkūn.