Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 89 Hüküm no: 24 Orijinal metin no: [4b-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahya Çelebi b. Hacı Abdülkerim’in Ereğli’nin Kuraş ve Koçaklar köylerindeki değirmen yeri, tarla ve dağdaki hissesini İbrahim Efendi b. Musa’ya sattığı Mahmiye-i İstanbul’da Âşıkpaşa Mahallesi sâkinlerinden Yahya Çelebi b. el-Hâc Abdülkerim nâm kimesne meclis-i şer‘-i şerîf-i enverde işbu bâ‘isü’r-rakīm İbrahim Efendi b. Musa mahzarında ikrâr ve takrîr-i kelâm edip akd-i âtî sudûruna değin yedimde mülküm olup vilâyet-i Anadolu’da Ereğli kazâsına tâbi‘ Kuraş nâm karyede vâki‘ Oğuzlar Deresi demekle ma‘rûf nehir suyu üzerinde dâir lede’l-ahâlî ve’l-cîrân ma‘lûmü’l-hudûd bir ocak mülk değirmen yerini tarafeynden îcâb ve kabûlü hâvî bey‘-i bâtt-ı sahîh-i şer‘î ile mezbûr İbrahim Efendi’ye otuz guruşu bey‘ ve teslîm ve yine karye-i mezbûre sınırı dâhilinde vâki‘ Koçaklar köyü demekle ma‘rûf mevzi‘de lede’l-ahâlî ve’l-cîrân ma‘lûmü’l-hudûd tahmînen beş keyl tohum istî‘âb eder üç kıt‘a tarlamı ve yine mahall-i mezbûrda olan dağda olan hisse-i şâyi‘amı bâ-izn-i sâhib-i arz dokuz guruş bedel mukābelesinde ferağ ve tefvîz ol dahi ber-vech-i muharrer iştirâ ve temellük ve tefevvüz ve kabûl eylediğinden sonra semen-i merkūm ve bedel-i mezbûrun dört guruşunu mezbûr İbrahim Efendi yedinden baʻde’l-kabz bâkī otuz beş guruşunu mezbûr İbrahim Efendi’ye otuz beş guruş deynim olmağla semen-i bâkī-i mezbûru deyn-i merkūma takās eylediğimde ol dahi mukāssa ve kabûl edip semen-i merkūm cem‘an otuz dokuz guruşu ol vechile mezbûr İbrahim Efendi yedinden ahz ve istîfâ eyledim baʻde’l-yevm zikr olunan değirmen yerinde ve tarlada ve dağda alâkam kalmayıp zikri mürûr eden değirmen yeri ve tarla ve dağ mezbûr İbrahim Efendi’nin mülk-i mahzı ve hakk-ı müfevvazı olmuşdur mahallerinde kabza mezbûr İbrahim Efendi’yi taslît eyledim keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-hüve’l-vâki‘ bi’t-taleb ketb olundu Fî 10 min-şehri Rebîʻülâhir sene 1121 Şuhûdü’l-hâl: Navluncu el-Hâc Hasan b. Mustafa, el-Hâc Mehmed b. Hüseyin, Hüseyin Çelebi b. İsmail, Süleyman Çelebi b. Musa, Halil Çelebi b. Abdülkerim, Halil Efendi b. Mustafa el-İmâm, Mehmed Efendi el-Hatîb, Mustafa Efendi kethüdâ-yı hazret-i efendi, Mustafa Çelebi b. Şa‘ban ve gayruhum mine’l-huzzâr.