Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 90 Hüküm no: 25 Orijinal metin no: [4b-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Asvader v. Sahak’ın mallarını korumak için amcası Kirkor v. Asvader’in vasi tayin edildiği Mahmiye-i İstanbul’da Salmatomruk kurbünde sâkin iken bundan akdem hâlik olan Sahak v. Asvader v. Mıgırdıç nâm zimmînin verâseti zevce-i metrûkesi Marta bt. Mıgırdıç ile sulbî sagīr oğulları Asvader ve Nihabed ve kızı Lusiton’a münhasıra ba‘dehû mezbûr Nihabed dahi hâlik olup verâseti anası Marta ile li-ebeveyn er [kız] karındaşı mezbûr[e] Lusiton’a münhasıra ba‘dehâ mezbûre Lusiton dahi hâlike olup verâseti anası Marta ile li-ebeveyn er karındaşı mezbûr Asvader’e münhasıra olduğu şer‘an zâhir ve mütehakkık oldukdan sonra sagīr-i mezbûr Asvader’in li-ebeveyn kız karındaşı hâlike-i mezbûre Lusiton’dan intikāl eden emvâlini zabt ve ahvâlini hıfz için bir vasî nasb olunmak lâzım ve mühim olmağın sagīr-i mezbûrun ammisi işbu bâ‘isü’s-sifr Kirkor v. Asvader nâm zimmî her vechile müstakīm ve vesâyet uhdesinden gelmeğe kādir olduğunu sikāt ihbârıyla müte‘ayyin olmağın hâkim-i muvakki‘-ı sadr-ı kitâb tûbâ-lehû ve hüsnü-meâb hazretleri sagīr-i mezbûrun emvâlini zabt ve ahvâlini hıfz için mezbûr Kirkor’u vasî nasb u ta‘yîn eyledikde ol dahi vesâyet-i mezkûreyi kabûl ve hizmet-i lâzımesin edâya ta‘ahhüd etmeğin mâ-vaka‘a bi’t-taleb ketb olundu. Fî 20 min-Muharremi’l-harâm sene 1121 Şuhûdü’l-hâl: Mustafa b. Şa‘ban, Ali b. İvaz, Abdullah b. Abdullah, Ali b. Bâli, Hasan el-Muhzır ve gayruhum mine’l-huzzâr.