Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 91 Hüküm no: 26 Orijinal metin no: [4b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Kamran bt. Abdullah b. Abdurrahman Hatun’un evini müştemilâtıyla birlikte Halil Çelebi b. Abdullah’a sattığı Mahmiye-i İstanbul’da Kâtib Hüsrev Mahallesi sâkinelerinden Kamran bt. Abdullah b. Abdurrahman nâm hatun tarafından husûs-ı âti’z-zikri ikrâra vekîl olduğu zât-ı mezbûreyi ma‘rifet-i şer‘iyye ile ârifân Mehmed Çelebi b. Mustafa ve Osman Çelebi b. Ramazan nâm kimesneler şehâdetleriyle şer‘an sâbit olan Mehmed Efendi b. Mustafa nâm kimesne mahfil-i kazâda işbu râfi‘u’l-kitâb Halil Çelebi b. Abdullah nâm kimesne mahzarında bi’l-vekâle ikrâr ve takrîr-i kelâm edip akd-i âti’z-zikrin sudûruna değin müvekkilem mezbûrenin yedinde mülk ve hakkı olup [5a] mahalle-i mezbûrede vâki‘ iki tarafdan Duhânî Ahmed Çelebi menzili ve bir tarafdan Gülgûn nâm hatun menzili ve bir tarafdan tarîk-i âm ile mahdûd fevkānî bir bâb oda ve bir sofa ve sokak kapısı üstünde vâki‘ bir bâb oda ve bir sofa ve tahtında bir bâb oda ve bir mahzen ve iki kenîf ve bir mikdâr bahçeyi müştemil mülk menzilini bi-cümleti’t-tevâbi‘ ve’l-levâhık ve kâffeti’l-hukūk ve’l-merâfık tarafeynden îcâb ve kabûlü hâvî bey‘-i bâtt-ı sahîh-i şer‘î ile merkūm Halil Çelebi’ye üç yüz guruşa bey‘ ve temlîk ve teslîm ol dahi ber-vech-i muharrer iştirâ ve temellük ve tesellüm ve kabz ve kabûl ettiğinden sonra semeni olan meblağ-ı mezbûr üç yüz guruşu merkūm Halil Çelebi yedinden tamamen ahz u kabz edip fîmâ-ba‘d menzil-i mahdûd-ı mezkûr cemî‘ müştemilâtıyla merkūm Halil Çelebi’nin mülk-i müşterâsı olup müvekkilem mezbûrenin kat‘â alâka ve medhali kalmamışdır keyfe mâ yeşâ ve yehtâr mutasarrıf olsun dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-şehri Rebîʻülâhir sene 1121 Şuhûdü’l-hâl: el-Hâc Yahya b. Ahmed, Mehmed Çelebi b. Ahmed, Hasan Çelebi b. Mehmed, Ahmed Çelebi b. Mehmed, el-Hâc Ahmed b. Abdullah, Ali Çelebi b. Mehmed, Sabuncu el-Hâc Ali b. Mustafa, el-Hâc Osman b. Mehmed, Mustafa Çelebi b. İbrahim, Ahmed Halîfe b. Musa el-Müezzin ve gayruhum mine’l-huzzâr.