Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 92 Hüküm no: 27 Orijinal metin no: [5a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Fâtıma bt. İsmail’in geçinemediği kocası Seyyid Hasan Efendi b. Seyyid Ahmed’den boşandığı Mahmiye-i Kostantıniyye’de Yenibahçe kurbünde Karabaş Mahallesi’nde sâkine olup zâtı Halil b. Mehmed ve Hacı Hasan b. Ali nâm kimesneler ta‘rîfleri ile mu‘arrefe olan Fâtıma bt. İsmail nâm hatun meclis-i şer‘-i şerîf-i enverde zevc-i muhâli‘i olan işbu bâ‘isü’l-kitâb es-Seyyid Hasan Efendi b. es-Seyyid Ahmed mahzarında ikrâr-ı tâm ve takrîr-i kelâm edip zevcim mezbûr es-Seyyid Hasan Efendi ile beynimizde hüsn-i mu‘âşeretimiz olmamağla zimmetinde mütekarrer ve ma‘kūdün-aleyh olan bin akçe mehr-i müeccelim ve nafaka-i iddet-i mu‘ayyene-i ma‘lûmem üzerlerine ve meûnet-i süknâm kendi üzerime olmak üzere mezbûr es-Seyyid Hasan Efendi ile muhâla‘a-i sahîha-i şer‘iyye ile hul‘ olduğumda ol dahi minvâl-i muharrer üzere hul‘-ı mezbûru kabûl eylediğinden sonra hukūk-ı zevciyete ve târih-i kitâba gelince beynimizde cereyân eden hukūka müte‘allika âmme-i de‘âvî ve mutâlebâtdan her birimiz âharın zimmetini ibrâ-i âmm-ı kātı‘u’n-nizâ‘la ibrâ ve iskāt eyledik fîmâ-ba‘d birbirimiz ile kat‘â da‘vâmız yokdur dedikde gıbbe’t-tasdîkı’ş-şer‘î mâ-vaka‘a bi’t-taleb ketb olundu. Fî 10 min-şehri Rebîʻülâhir sene 1121 Şuhûdü’l-hâl: Halil b. Mehmed, el-Hâc Hasan b. Ali, Mustafa Çelebi b. Şa‘ban, Ali Çelebi b. Yusuf, Ahmed b. el-Hâc Abdullah ve gayruhum mine’l-huzzâr.