Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 92 Hüküm no: 28 Orijinal metin no: [5a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Serkiz v. Abraham’ın vârisleri olan torunları Abraham v. Sahak ile Benefşe bt. Sahak’ın kendilerine intikal eden evi aralarında taksim ettikleri Husûs-ı âti’l-beyânın mahallinde keşf ü tahrîr ve taksîmi bâbında sâdır olan fermân-ı şerîfe imtisâlen taraf-ı şer‘den irsâl olunan Mevlânâ Ali Efendi Ser-mi‘mâr-ı Hâssa Mehmed Efendi ve Hasan Halîfe ve Mehmed Halîfe ve Şa‘ban Halîfe ve mi‘mâr-ı kâtib Mehmed Efendi ile mahmiye-i İstanbul’da Ayvansaraykapısı dâhilinde Mustafa Paşa-yı Atîk Mahallesi’nde vâki‘ zikri câʻî menzile varıp zeyl-i kitâbda mektûbü’l-esâmî Müslimîn huzûrunda akd-i meclis-i şer‘-i nebevî eyledikde mahalle-i mezkûrede sâkin iken bundan akdem hâlik olan Serkiz v. Abraham nâm zimmînin verâseti kendiden mukaddem hâlik olan oğlu Sahak’ın oğlu Abraham’a ve kızı Benefşe’ye münhasıra ve tashîh-i mes’elesi üç sehmden olup sihâm-ı mezkûreden iki sehmi mezkûr Abraham’a ve bir sehmi mezkûre Benefşe’ye isâbet ve intikāl eylediği şer‘an zâhir ve mütebeyyin oldukdan sonra mezkûre Benefşe’nin zevci ve tarafından husûs-ı âti’l-beyâna vekîl olduğu zât-ı mezkûreyi ma‘rifet-i şer‘iyye ile ârifân Bayram v. Abraham ve Aritun v. Aleksan nâm zimmîler şehâdetleriyle sâbit olan Hürmüz v. Semaven nâm zimmî meclis-i ma‘kūd-ı mezkûrda mezbûr Abraham muvâcehesinde takrîr-i kelâm edip müvekkilem mezkûre ile merkūm Abraham’ın mûrisleri hâlik-i mezkûrun terekesinden olup işbu bir tarafdan Matrakçıoğlu Yanaki zimmî menzili ve baʻzan Gonca nâm Nasrâniye menzili ve bir tarafdan Elmas zimmî menzili ve baʻzan David nâm Yahûdi menzili ve iki tarafdan tarîk-i âm ile mahdûd büyût-ı adîde ve kenîf ve bi’r-i mâ ve matbah ve havlu ve cüneyneyi müştemil mülk menzil kābil-i taksîm olmağla hâlâ beynimizde alâ-kadri’l-hısas rızâmız ile iktisâm ve her birimizin hissesi ifrâz ve alâmât-ı fâsıla vaz‘ıyla birbirinden mümtâz kılınmak matlûbumdur dedikde gıbbe’l-mu‘âyene ve’l-müşâhede mi‘mârûn-ı mezkûrûn mesâha ve tahmîn ve takvîm eylediklerinde mecmû‘-ı menzil-i mahdûd-ı mezkûrun binâlı ve binâsız arsasının kıymeti iki yük otuz sekiz bin beş yüz on akçeye bâliğ olup meblağ-ı mezkûrun yüz elli dokuz bin altı akçesi mezkûr Abraham’a ve yetmiş dokuz bin beş yüz üç akçesi mezkûre Benefşe’ye isâbet eylediği müte‘ayyin oldukdan sonra mecmû‘u yüz otuz bir bin yüz yirmi akçe kıymetli iki fevkānî oda ve bir köşk ve tahtında bi’r-i mâya muttasıl on üç zirâ‘ arsa ve bir dehlîz ve vustânî bir oda ve tahta-pûş ve matbah ve kenîf ve sofa ve dehlîz ve tahtânî bir bodrum ve mahtab ve bir kömürlük ve kenîf ve iki tarafı taş duvar bahçe arsası ve bi’r-i mâ ve havlu ve sokak kapısı rızâlarıyla mezkûre Benefşe’nin hissesine ta‘yîn ve tahsîs ve mecmû‘u yüz yedi bin üç yüz doksan akçe kıymetli fevkānî iki oda ve bir matbah ve bir sofa ve dehlîz ve kenîf ve vustânî üç oda ve bir kenîf ve bir sofa ve dehlîz ve tahtânî bir mahtab ve bi’r-i mâ ve bir ocak ve havlu ve <> kenîf ve kömürlük ve ona muttasıl on altı zirâ‘ arsa-yı hâliye ve sokak kapısı mezkûr Abraham’ın hissesine ta‘yîn ve tahsîs ve ifrâz ve alâmet-i fâsıla vaz‘ıyla âharın hissesinden mümtâz ve her biri hisse-i mu‘ayyene-i müfrezelerini hüsn-i rızâlarıyla kabûl eylediklerinden sonra mezkûre Benefşe’nin hissesine ziyâde geçen elli dört bin seksen akçeyi vekîl-i mezkûr mezbûr Abraham’a def‘ u teslîm ol dahi yedinden bi’t-tamam ve’l-kemâl ahz u kabz ve tesellüm eyleyip baʻde’l-yevm ancak menzil-i mahdûd-ı mezkûra müte‘allika da‘vâdan her birimiz âharın zimmetini ibrâ-i âmm-ı râfi‘u’l-hısâm ile ibrâ ve iskāt eyledik dediklerinde gıbbe’t-tasdîkı’ş-şer‘î vâki‘ hâli mevlânâ-yı mezkûr mahallinde ketb ü tahrîr edip ba‘dehû ma‘an irsâl olunan el-Hâc Hüseyin b. Abdullah ve diğer Hüseyin b. Hasan ile meclis-i şer‘a gelip alâ-vukū‘ihî inhâ ve takrîr etmeğin mâ-vaka‘a bi’t-taleb ketb olundu. Fî 16 min-Rebî‘ülevvel sene 1121 Şuhûdü’l-hâl: el-Hâc Ahmed Efendi b. Ali el-İmâm, Müezzin Mustafa Çelebi b. Abdurrahman, Müezzin İsmail Çelebi b. Mustafa, Mehmed Efendi b. Yusuf, Abdülbâki Çelebi b. Ali, Ahmed Çelebi b. Hasan, Yusuf Çelebi b. Cuma, Mehmed Çelebi b. Mustafa, Hüseyin Çelebi b. Musa, Hüseyin Çelebi b. Abdullah, el-Hâc Süleyman b. Halil, Hüseyin Çelebi b. Ömer, Hüseyin Çelebi b. Abdülbâki, Mustafa Çelebi b. Eyüb ve gayruhum mine’l-huzzâr.