Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 96 Hüküm no: 33 Orijinal metin no: [6a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Bogasıcı Mustafa Çelebi b. Mehmed’in, Dimitri v. Anton v. Yani ile ortağı Lambo v. Dimitri’de olan alacağının ödenmesi Bogasıcı tâifesinden işbu râfi‘u’l-kitâb Mustafa Çelebi b. Mehmed nâm kimesne mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i İstanbul’da Sipâhîler sûkunda vâki‘ Nişli Ali Ağa dükkânında müsteciri ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğunu yedinde mazmûnu müsbet hüccet ile sâbit olan mahmiye-i mezbûrede Çadırcı Ahmed Mahallesi’nde mütemekkin Kostantin v. Hristo nâm zimmî ile gāib-i mezbûrun şerîki Lambo v. Dimitri zimmî muvâcehelerinde üzerlerine da‘vâ ve takrîr-i kelâm edip gāib-i merkūm Dimitri ile şerîki işbu merkūm Lambo zimmetlerinde yedimden iştirâ ve kabz ettikleri levn ve zirâ‘ı beynimizde ma‘lûm bogası semenlerinden ba‘de külli hesâb yüz elli guruş hakkım olup hattâ meblağ-ı mezbûr bana deyni olduğunu alâ-ruûsi’l-istişhâd ikrâr ve işhâd dahi etmeleriyle suâl olunup meblağ-ı mezbûru bana edâya tenbîh olunmak matlûbumdur dedikde gıbbe’s-suâl merkūm Kostantin ber-vech-i muharrer vekâletini ikrâr lâkin husûs-ı mezkûru inkâr ettiklerinde müdde‘î-i mezbûrdan müdde‘âsını mübeyyine beyyine taleb olundukda Havâss-ı Aliyye kazâsı muzâfâtından Hasköy’de sâkin Aslan v. Espe nâm Yahûdi ile Begos v. Fehrad nâm zimmî li-ecli’ş-şehâde mahfil-i kazâya hâzırân olup isre’l-istişhâd fi’l-hakīka gāib-i mezbûr Dimitri v. Anton v. Yani ve merkūm Lambo bundan akdem zikr olunan bogası bahâsından müdde‘î-i mezbûra yüz elli guruş zimmetimde deynimdir deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle oldukdan sonra mûcebince meblağ-ı mezbûr yüz elli guruşu müdde‘î-i mezbûra edâya mezbûrlara tenbîh-birle mâ-vaka‘a bi’t-taleb ketb olundu. Fî-gurreti Muharremi’l-harâm sene 1121 Şuhûdü’l-hâl: Es-sâbikūn, es-sâbikūn, es-sâbikūn.