Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 97 Hüküm no: 34 Orijinal metin no: [6a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. İstodori v. Matuk’un Dimitri v. Anton v. Yani’de kalan alacağı ile atlasını Dimitri’nin vekili Kostantin v. Hristo’nun ödemesi Mahmiye-i İstanbul’da Samatyakapısı kurbünde sâkin işbu râfi‘u’s-sifr İstodori v. Matuk nâm zimmî mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i mezbûrede Sipâhî sûkunda vâki‘ Nişli Ali Ağa’nın dükkânında müsteciri olup dikilmiş çuka yapağı olan gāib ani’l-beled Dimitri v. Anton v. Dimitri [Yani] nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan mahmiye-i mezbûrede Çadırcı Ahmed Mahallesi’nde sâkin Kostantin v. Hristo nâm zimmî mahzarında üzerine da‘vâ ve takrîr-i kelâm edip gāib-i merkūm zimmetinde beynimizde ma‘lûm atlas bahâsından altmış iki guruş hakkım olup hattâ meblağ-ı merkūm bana deyni olduğunu ikrâr ve işhâd dahi edip ve bir top beyaz atlasımı merkūma îdâ‘ ve teslîm ol dahi istîdʻâ ettikden sonra meblağ-ı mezbûrun yirmi beş guruşunu kendiden ahz ve istîfâ edip otuz yedi guruşu zimmetinde ve mârru’z--zikr atlas yedinde bâkī kalmağla suâl olunup meblağ-ı mezbûr otuz yedi guruşu edâya ve mârru’z--zikr atlasın mevcûd ise aynını müstehleke ise ba‘de’s-sübût kıymet-i şer‘iyyesini bana edâya tenbîh olunmak matlûbumdur dedikde gıbbe’s-suâl vekîl-i merkūm ber-vech-i muharrer vekâletini ikrâr lâkin husûs-ı mezkûru inkâr edicek müdde‘î-i merkūmdan müdde‘âsını mübeyyine beyyine taleb olundukda mahmiye-i mezbûrede Abdi Subaşı Mahallesi’nde sâkin Yanaki v. Dimitri ve Mirâhor Mahallesi’nde sâkin Anton v. Yani nâm zimmîler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka gāib-i merkūm Dimitri v. Anton v. Yani nâm zimmî bundan akdem müdde‘î-i mezbûra zikr olunan atlas bahâsından altmış iki guruş zimmetimde deynimdir deyü bizim huzûrumuzda ikrâr ve bizi işhâd edip ve müdde‘î-i merkūm bizim huzûrumuzda kıymeti beynlerinde ma‘lûm bir top beyaz atlasını merkūm Dimitri’ye îdâ‘ ve teslîm ol dahi istîdʻâ ve kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın mûcebince baʻde’l-hükm meblağ-ı bâkī-i mezbûr otuz yedi guruşu edâya ve mârru’z--zikr atlasın mevcûd ise aynının müstehlek ise ba‘de’s-sübût kıymet-i şer‘iyyesini edâya vekîl-i merkūma ba‘de’t-tenbîh mâ-vaka‘a bi’t-taleb ketb olundu. Fî 3 min-Muharremi’l-harâm sene 1121 Şuhûdü’l-hâl: Es-sâbikūn, es-sâbikūn, es-sâbikūn.