Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 98 Hüküm no: 35 Orijinal metin no: [6a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Uncu Fazlı Ağa b. Mustafa’nın alacaklısı olduğu Marko v. Marat’tan parasını alıp zimmetini ibra ettiği Uncu tâifesinden işbu râfi‘u’l-kitâb Fazlı Ağa b. Mustafa nâm kimesne meclis-i şer‘-i şerîf-i enverde Marko v. Marat nâm zimmî muvâcehesinde üzerine da‘vâ ve takrîr-i kelâm edip işbu yedimde olan istiğlâl hücceti nâtıka olduğu üzere cihet-i deyn-i şer‘îden mezbûr Marko zimmetinde kırk iki bin elli yedi akçe hakkım olup meblağ-ı mezbûrun on altı bin dört yüz kırk akçesini bana def‘ ü teslîm edip ben dahi yedinden baʻde’l-kabz yirmi beş bin altı yüz on yedi akçesi zimmetinde bâkī kalmağla meblağ-ı bâkī-i mezbûru merkūm Marko’dan taleb eylediğimde edâdan imtinâ‘ eder suâl olunup alıverilmesi matlûbumdur dedikde gıbbe’s-suâl merkūm Marko cevâbında fi’l-vâki‘ kaziyye vech-i muharrer üzere olup cihet-i mezbûreden müdde‘î-i mezbûr Fazlı Ağa’ya el-ân zimmetimde edâsı lâzım [6b] meblağ-ı bâkī-i mezbûr yirmi beş bin altı yüz on yedi akçe deynim vardır deyü ikrâr u i‘tirâf etmeğin alâ-mûcebi i‘tirâfihî meblağ-ı bâkī-i mezbûru müdde‘î-i mezbûra edâya merkūm Marko zimmîye ba‘de’t-tenbîh müdde‘î-i mezbûr Fazlı Ağa meclis-i hatîrde merkūm Marko muvâcehesinde ikrâr ve takrîr-i kelâm edip ânifen edâsına tenbîh olunan meblağ-ı bâkī-i mezbûru merkūm Marko bana def‘ ü teslîm ben dahi yedinden tamamen ahz u kabz eyledim baʻde’l-yevm meblağ-ı mezbûr kırk iki bin elli yedi akçeden merkūm Marko zimmetinde bir akçe ve bir habbe hakkım kalmadı dedikde gıbbe’t-tasdîkı’l-mer‘î mâ-vaka‘a bi’t-taleb ketb olundu. Fî 8 min-şehri Rebîʻülâhir sene 1121 Şuhûdü’l-hâl: Mustafa Ağa b. Ahmed el-Mübâşir, Mustafa Çelebi b. Şa‘ban, Ali Çelebi b. İvaz, Hasan Çelebi b. Mustafa ve gayruhum mine’l-huzzâr.