Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 100 Hüküm no: 39 Orijinal metin no: [6b-4] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Yako v. David’in, Dimitri v. Anton v. Yani ile ortağı Lambo v. Dimitri’de çuka bedelinden olan alacağının ödenmesi Mahmiye-i İstanbul’da Tekfur Sarayı kurbünde sâkin işbu râfi‘u’s-sifr Yako v. David nâm Yahûdi mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i mezbûrede Sipâhî sûkunda vâki‘ Nişli Ali Ağa dükkânında müstecir ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu mazmûnu müsbet hüccet ile sâbit olan Çadırcı Ahmed Mahallesi’nde sâkin Kostantin v. Hristo nâm zimmî mahzarında üzerine da‘vâ ve takrîr-i kelâm edip gāib-i merkūm Dimitri ile şerîki işbu hâzır bi’l-meclis Lambo v. Dimitri’ye her zirâ‘ı ikişer guruş ve üçer rub‘a olmak üzere iki yüz zirâ‘ Fransız londrinesi elvân çukamı beş yüz elli guruşa bey‘ ve teslîm onlar dahi ber-vech-i muharrer iştirâ ve tesellüm etmeleriyle merkūm Lambo ile vekîl-i merkūma suâl olunup meblağ-ı merkūmu bana edâya tenbîh olunmak matlûbumdur dedikde gıbbe’s-suâl ve’l-inkâr müdde‘î-i mezbûrdan müdde‘âsını mübeyyine beyyine taleb olundukda Hasköy’de sâkin Polonya cemâ‘atinden Menyamin v. Mihal ve Pîrî Paşa’da sâkin Sagunya v. Mosi nâm Yahûdiler mahfil-i kazâya hâzırân olup isre’l-istişhâd fi’l-hakīka bundan akdem müdde‘î-i merkūm mezbûrân Dimitri ve Lambo’ya târih-i kitâbdan beş ay mukaddem zirâ‘ı ikişer guruş ve üçer rub‘a olmak üzere iki yüz zirâ‘ Fransız londrinesi elvân çukasını beş yüz elli guruşa bey‘ ve teslîm onlar dahi ber-vech-i muharrer iştirâ ve tesellüm eylediler biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm ve’t-tenbîh mâ-vaka‘a bi’t-taleb ketb olundu. Fî 29 min-Zilhicceti’ş-şerîfe sene 1120 Şuhûdü’l-hâl: el-Hâc Mustafa Efendi tâbi‘-i hazret-i efendi, el-Hâc Mustafa Beşe Çukadâr, el-Hâc Mehmed Çelebi b. ( ) ve gayruhum mine’l-huzzâr.