Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 101 Hüküm no: 40 Orijinal metin no: [6b-5] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Aron v. Mosi’nin çuka bedelinden Dimitri v. Anton v. Yani’de olan alacağını Dimitri’nin vekili Kostantin v. Hristo’nun ödemesi Tâife-i Yahudun Triye cemâ‘atinden işbu râfi‘u’s-sifr Aron v. Mosi nâm Yahûdi mahfil-i kazâda mahrûse-i Galata’da Beyoğlu Mahallesi’nde sâkin olup mahmiye-i İstanbul’da Sipâhî sûkunda vâki‘ Nişli Ali Ağa dükkânında müste’[cir] ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo nâm zimmî mahzarında üzerine da‘vâ ve takrîr-i kelâm edip târih-i kitâbdan dört buçuk ay mukaddem her zirâ‘ı ikişer buçuk guruşa olmak üzere üç yüz elli altı zirâ‘ Fransız londrine çukamı gāib-i merkūm Dimitri’ye sekiz yüz doksan guruşa bey‘ ve teslîm ol dahi iştirâ ve tesellüm etmekle suâl olunup edâya tenbîh olunmak matlûbumdur dedikde gıbbe’s-suâl merkūm Kostantin cevâbında ber-vech-i muharrer vekâletini ikrâr lâkin husûs-ı mezkûru inkâr edicek müdde‘î-i merkūmdan müdde‘âsını mübeyyine beyyine taleb olundukda Pîrî Paşa Mahallesi’nde sâkin olup Mesine cemâ‘atinden Yako v. Haim ve Abraham v. İlya nâm Yahûdiler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka müdde‘î-i merkūm Aron târih-i kitâbdan dört buçuk ay mukaddem gāib-i merkūm Dimitri v. Anton v. Yani’ye zirâ‘ı ikişer buçuk guruşa olmak üzere üç yüz elli altı zirâ‘ Fransız londrinesi çukasını bizim huzûrumuzda sekiz yüz doksan guruşa bey‘ ve teslîm ol dahi iştirâ ve kabz eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm meblağ-ı mezbûru müdde‘î-i merkūma edâya vekîl-i merkūma tenbîh-birle mâ-vaka‘a bi’t-taleb ketb olundu. Fî 29 min-Zilhicceti’ş-şerîfe sene 1120 Şuhûdü’l-hâl: Es-sâbikūn, es-sâbikūn, es-sâbikūnü’ş-şâhidûn