Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 102 Hüküm no: 41 Orijinal metin no: [7a-1] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Yahûdi Kamel v. Mosi’nin çuka bedelinden Dimitri v. Anton v. Yani’de olan alacağını Dimitri’nin vekili Kostantin v. Hristo’nun ödemesi Tâife-i Yahudun Katalan cemâ‘atinden işbu râfi‘u’s-sifr Kamel v. Mosi nâm Yahûdi mahfil-i kazâda mahrûse-i Galata’da Beyoğlu Mahallesi ahâlîsinden olup mahmiye-i İstanbul’da Sipâhî sûkunda dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo nâm zimmî mahzarında üzerine da‘vâ ve takrîr-i kelâm edip merkūm Dimitri zimmetinde beynimizde ma‘lûm çuka bahâsından beş yüz otuz dört guruş hakkım olup meblağ-ı mezbûrun üç yüz elli guruşunu ahz u kabz ve yüz seksen dört guruşu zimmetinde bâkī kalıp hattâ târih-i kitâbdan üç ay mukaddem Şevvâl’de meblağ-ı bâkī-i mezbûr bana deyni olduğunu alâ-ruûsi’l-is[ti]şhâd ikrâr ve işhâd dahi etmekle suâl olunup meblağ-ı bâkī-i mezbûr yüz seksen dört guruşu bana edâya vekîl-i merkūma tenbîh olunmak matlûbumdur dedikde gıbbe’s-suâl merkūm Kostantin cevâbında ber-vech-i muharrer vekâletini ikrâr lâkin husûs-ı mezkûru inkâr edicek müdde‘î-i mezbûrdan müdde‘âsını mübeyyine beyyine taleb olundukda Triye cemâ‘atinden olup Pîrî Paşa’da sâkin Aron v. Mosi ve Yako v. Haim nâm Yahûdiler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka gāib-i mezbûr Dimitri v. Anton v. Yani târih-i kitâbdan üç ay mukaddem şehr-i Şevvâl’de müdde‘î-i merkūm Kamel Yahûdi’ye zikr olunan çuka bahâsından yüz seksen dört guruş zimmetimde bâkī lâzımü’l-kazâ deynimdir deyü bizim huzûrumuzda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de ri‘âyeti şerâiti’l-kabûl şehâdetleri makbûle olmağın mûcebince baʻde’l-hükm meblağ-ı bâkī-i mezbûr yüz seksen dört guruşu edâya vekîl-i merkūma tenbîh-birle mâ-vaka‘a bi’t-taleb ketb olundu. Fî-gurreti Muharremi’l-harâm sene 1121 Şuhûdü’l-hâl: el-Hâc Mustafa Efendi Kethüdâ-yı hazret-i efendi, el-Hâc Mehmed Çelebi tâbi‘-i o, el-Hâc Hüseyin Beşe Çukadâr, Mustafa Çelebi b. ( ) ve gayruhum mine’l-huzzâr.