Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 103 Hüküm no: 42 Orijinal metin no: [7a-2] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Tüccar Yahûdi Sahak v. Abraham’ın çuka bedelinden Dimitri v. Anton v. Yani’de olan alacağını Dimitri’nin vekili Kostantin v. Hristo’nun ödemesi Tüccâr tâifesinden işbu râfi‘u’s-sifr Sahak v. Abraham nâm Yahûdi mahfil-i kazâda mahrûse-i Galata’da Beyoğlu Mahallesi mütemekkinlerinden olup mahmiye-i İstanbul’da Sipâhî sûkunda vâki‘ Nişli Ali Ağa dükkânında müstecir ve dikilmiş çuka yapağı olan gāib ani’l-beled Dimitri v. Anton v. Yani nâm zimmî tarafından düyûn-ı müsbitesini edâya vekîl olduğu yedinde mazmûnu [müsbet] hüccet-i şer‘iyye ile sâbit olan Kostantin v. Hristo nâm zimmî muvâcehesinde takrîr-i kelâm ve tasvîr-i müdde‘â edip gāib-i merkūm Dimitri zimmetinde her zirâ‘ı üçer yüz on beşer akçeye olmak üzere baltacı külâhı renginde yirmi iki zirâ‘ londrine çuka bahâsından cem‘an elli yedi guruş üç rub‘ hakkım olup hattâ meblağ-ı merkūm bana deyni olduğunu ikrâr dahi edip kable’l-ahz ve’l-istîfâ gāib olmağla suâl olunup meblağ-ı mezbûru bana edâya vekîl-i tenbîh olunmak matlûbumdur dedikde gıbbe’s-suâl vekîl-i merkūm vekâletini ikrâr lâkin husûs-ı mezkûru inkâr ettikde müdde‘î-i merkūmdan müdde‘âsını mübeyyine beyyine taleb olundukda mahmiye-i merkūmede Ayakapısı’nda mütemekkin Nesim v. Yasef ve Havâss-ı Aliyye muzâfâtından Hasköy mütemekkinlerinden Avraham v. Sahak nâm Yahûdiler li-ecli’ş-şehâde mahfil-i kazâya hâzırân olup isre’l-istişhâd fi’l-hakīka gāib-i merkūm Dimitri v. Anton v. Yani işbu müdde‘î-i mezbûrdan her zirâ‘ı üçer yüz [on] beşer akçeye olmak üzere baltacı külâhı renkli yirmi iki zirâ‘ londrine çuka bahâsından cem‘an elli yedi guruş üç rub‘ zimmetimde lâzımü’l-edâ deynim vardır deyü bizim yanımızda ikrâr ve bizi işhâd eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde ba‘de’t-ta‘dîl ve’t-tezkiye şehâdetleri makbûle olmağın gıbbe’t-tahlîfü’ş-şer‘î meblağ-ı merkūm elli yedi guruş üç rub‘u müdde‘î-i merkūma edâ ve teslîme vekîl-i merkūma ba‘de’t-tenbîh mâ-vaka‘a bi’t-taleb ketb olundu. Fî 25 min-Rebîʻülâhir sene 1121 Şuhûdü’l-hâl: el-Hâc Mustafa Efendi, el-Hâc Hüseyin b. Abdullah Çukadâr, Hüseyin Çelebi b. Şa‘ban, Ahmed Çelebi b. Ali, Ahmed Beşe b. Abdullah, el-Hâc Osman b. Abdurrahman ve gayruhum mine’l-huzzâr.