Bab Mahkemesi 92 Numaralı Sicil (H. 1120-1121 / M. 1709) cilt: 60, sayfa: 103 Hüküm no: 43 Orijinal metin no: [7a-3] Bu defter İBB Kültür A.Ş. ve Medipol Üniversitesi Hukuk Fakültesi ortaklığı ile hazırlanmıştır. Ali b. Abdullah’ın Dimitri v. Anton v. Yani’de olan alacağını Dimitri’nin vekili Kostantin v. Hristo’nun ödemesi Mahmiye-i İstanbul’da Hobyar Mahallesi’nde sâkin işbu râfi‘u’l-vesîka Ali b. Abdullah nâm kimesne gāib ani’l-beled Dimitri v. Anton v. Yani nâm zimmînin düyûn-ı müsbitesini edâya vekîli olduğu yedinde mazmûnu müsbet hüccet ile sâbit olan Kostantin v. Hristo nâm zimmî muvâcehesinde üzerine da‘vâ ve takrîr-i kelâm edip gāib-i merkūm Dimitri’ye yüz altmış guruşumu bundan akdem ikrâz ve teslîm ve beynimizde ma‘lûm iki top bezimi dahi yirmi guruşa bey‘ ve teslîm ol dahi iktirâz ve kabz ve iştirâ ve tesellüm etmekle suâl olunup alıverilmesi matlûbumdur dedikde gıbbe’s-suâl vekîl-i mezbûr ber-vech-i muharrer vekâletini ikrâr lâkin husûs-ı mezkûru inkâr edicek müdde‘î-i mezbûrdan müdde‘âsını mübeyyine beyyine taleb olundukda udûl-i Müslimînden olup Soğanağa Mahallesi’nde sâkin Dellâl Ali b. Sefer nâm kimesne ile Mirâhor’da sâkin Anton v. Yani nâm zimmî li-ecli’ş-şehâde mahfil-i kazâya hâzırân olup isre’l-istişhâd fi’l-hakīka bundan akdem müdde‘î-i mezbûr gāib-i merkūm Dimitri v. Anton v. Yani’ye yüz altmış guruşunu bizim huzûrumuzda ikrâz ve teslîm ve iki top bezini dahi yirmi guruşa bey‘ ve teslîm ol dahi iktirâz ve kabz ve iştirâ ve tesellüm eyledi biz bu husûsa bu vech üzere şâhidleriz şehâdet dahi ederiz deyü her biri edâ-yı şehâdet-i şer‘iyye eylediklerinde gıbbe ri‘âyeti şerâiti’l-kabûl şehâdetleri makbûle olmağın mûcebince cem‘an yüz seksen guruşu müdde‘î-i mezbûra edâya vekîl-i merkūma tenbîh-birle mâ-vaka‘a bi’t-taleb ketb olundu. Fî 7 mine’l-Muharremi’l-harâm sene 1121 Şuhûdü’l-hâl: el-Hâc Mustafa Efendi tâbi‘-i efendi, el-Hâc Hüseyin Beşe Çukadâr, Mustafa Efendi b. Ali el-Kâtib, Mustafa Çelebi b. ( ) ve gayruhum mine’l-huzzâr.